لاہور( این این آئی)نامور اداکارہ مہوش حیات نے کہا ہے کہ تعلیم سے انسان میں شعور آتا ہے اور اس کے مجموعی طو ر پر معاشرے پر مثبت اثرات ہوتے ہیں ،کسی بھی شعبے میں ترقی کیلئے تعلیم کا حصول نا گزیر ہے ۔ ایک انٹر ویو میں مہوش حیات نے کہا کہ پاکستان میں اب تعلیم پر خصوصی توجہ دی جارہی ہے اور خاص طو رپر وہ والدین

جو تعلیم حاصل کرنے سے محروم رہے وہ کم وسائل ہونے کے باوجود اپنا پیٹ کاٹ کر اپنے بچوں کو تعلیم دلوارہے ہیں اور ایسے والدین حقیقی معنوںمیں رشک کرنے کے قابل ہیں۔ مہوش حیات نے کہا کہ ضروری نہیں کہ آپ تعلیم حاصل کر کے کسی بڑے عہدے پر پہنچیںبلکہ اس سے انسان میںشعور آتا ہے اور ہمارے معاشرے کو اسی کی اشد ضرورت ہے ۔ انہوں نے کہا کہ میری زندگی کا مشاہدہ ہے کہ تعلیم یافتہ لو گ تجربہ حاصل کرنے کے بعد زیادہ تیز رفتاری سے ترقی کرتے ہیں جبکہ تعلیم کے بغیر تجربہ رکھنے کے باوجود لوگوں کو آگے بڑھنے میں مشکلات کاسامنا رہتا ہے ۔دوسری جانب نامورگلوکارہ وماڈل مسکان جے نے کہا ہے کہ عرصہ درازسے لائیو شوز ختم ہو چکے ہیں اور اس کے ساتھ فلم انڈسٹری میں بھی کام نہ ہونے سے گلوکاروں کو شدید مالی مشکلات کا سامنا ہے ۔ایک انٹر ویو میں گلوکارہ نے کہا کہ شوبز میں ایک طبقہ ایسا بھی ہے جو کام نہ ہونے کے باعث پہلے ہی شدید مشکلات سے دوچار تھا اوررہی سہی کسر کورونانے نکال دی ہے ۔انہوںنے کہاکہ جب فلم انڈسٹری میں سر گرمیاں عروج پکڑیں گی تو اس سے جڑے ہوئے شعبے بھی ترقی کریں گے۔ انہوں نے کہا کہ ان دنوںجب موسیقی میں کوئی خاص کام نہیں ہو رہا میں نے اس کے باوجود اپنی مشق نہیں چھوڑی اورروزانہ دو گھنٹے ریاضت کرتی ہوں ۔ انہوںنے کہا کہ نئے فنکار محنت کرنے سے گھبراتے ہیں جبکہ میری ذاتی رائے ہے کہ موسیقی ایسا شعبہ ہے جہاں پر کوئی سفارش اور شارٹ کٹ نہیں چلتا بلکہ آپ کواپنی خوبصورت گائیکی کے بل بوتے پر ہی مقام بنانا پڑتاہے ۔

موضوعات:مہوش حیات