لاہور(این این آئی)سینئر اداکار ایوب کھوسو نے کہا ہے کہ میری تعلیم کوئٹہ میں مکمل ہوئی ،میرے سکول میں ڈرامہ اور میوزک کی کلاسز ہوتی تھیں جنہیں دیکھنے کے بعد مجھ میں اداکاری کا شوق پیدا ہوا ۔ انہوں نے کہا کہ میں نے پی ٹی وی کوئٹہ سے بننے والی ڈرامہ سیریل ’’چھائوں ‘‘میں اداکاری کی جس میں مجھے پورے پاکستان میں روشناس کروا دیا ، ڈرامہ سیریل میں میرے ہمراہ لیلیٰ زبیری ، ریاض ،ذوالقرنین حیدر سمیت دیگر اداکار شامل

تھے ۔اس کے بعد ڈرامہ پروڈیوسر طارق معراج کی ڈرامہ سیریل ’’ بھنور ‘‘اور پھر ’’گشت ‘‘جیسی ڈرامہ سیریل نے میری شہرت کو عروج تک پہنچا دیا ۔ انہوں نے کہا کہ کوئٹہ ،کراچی ، نصیر آباد اور جیکب آباد میرے گھر ہیں ، ویسے تو پورا پاکستان ہی میرا گھر ہے اور جہاں بھی جاتا ہوں تو لوگ محبتیں نچھاور کرتے ہیں ۔ انہوں نے کہا کہ ٹی وی پر کام کرتے ہوئے تین دہائیاں گزر چکی ہیں ۔ مجھے کوکنگ کرنی بھی آتی ہے اور تمام ڈشز اچھی بنا لیتا ہوں ۔