نئی دہلی(شوبز ڈیسک) بالی ووڈ کے نئے فلم ساز ونود تیواری نے بھارتی کامیڈین کپل شرما کی زندگی پر فلم بنانے میں دلچسپی کا اظہار کیا ہے۔بھارتی میڈیا رپورٹس کے مطابق بالی ووڈ ہدایت کار ونود تیواری کامیڈین کرشنا ابھیشیک کے ساتھ اپنی پہلی فلم تیری بھابھی ہے پاگل بنا رہے ہیں۔ ایک انٹرویو میں ان کا کہنا تھا کہ فلم سنجو دیکھ کر میں اس فلم سے بہت متاثر ہوا اور سوچا کہ میں بھی معروف کامیڈین کپل شرما کی بائیو گرافی پر ایک فلم بناؤں
کیوں کہ ان کی حقیقی زندگی بھی بہت دلچسپ رہی ہے۔فلم ساز سے پوچھا گیا کہ کپل شرما کی بائیو گرافی کا کردار کون نبھائے گا جس کا انہوں نے جواب دیتے ہوئے کہا کہ اگر کپل شرما خود اپنا کردار ادا کرنے پر رضامند ہوتے ہیں تو یہ اچھا ہے کیوں کہ میں خود ان کے ساتھ کام کرنا چاہتا ہوں۔انہوں نے مزید کہا کہ اگر کپل شرما راضی نہیں ہوتے تو کرشنا ابھیشیک اس بائیو گرافی کیلئے بہترین انتخاب ہوں گے کیوں کہ یہ دونوں اداکار اس کردار کو بخوبی نبھا سکتے ہیں۔
