اسلام آباد (نیوز ڈیسک) ٹیکنالوجی کمپنی سام سنگ نے اپنی دو معروف ایپس اے آر ڈُوڈل (AR Doodle) اور کوئک میژر (Quick Measure) کو مرحلہ وار ختم کرنے کا فیصلہ کیا ہے۔ کمپنی کے مطابق 31 دسمبر 2026 کے بعد یہ دونوں ایپس گلیکسی ایپ اسٹور سے ڈاؤن لوڈ کے لیے دستیاب نہیں ہوں گی۔

رپورٹس کے مطابق سام سنگ نے گلیکسی ایپ اسٹور پر دونوں ایپس کے چینج لاگز میں ترمیم کرتے ہوئے صارفین کو اس فیصلے سے آگاہ کردیا ہے۔ بعض جدید گلیکسی ڈیوائسز پر یہ ایپس پہلے ہی دستیاب نہیں یا انہیں سپورٹ حاصل نہیں، جن میں گلیکسی زیڈ فولڈ 8 بھی شامل ہے۔اے آر ڈُوڈل ایسی سہولت فراہم کرتی ہے جس کے ذریعے صارف موبائل کیمرے کی مدد سے اپنے اردگرد کے ماحول میں ورچوئل ڈرائنگ بنا سکتا ہے۔ بنائی گئی ڈرائنگ چہرے یا مختلف اشیا کے ساتھ منسلک رہتی ہے، جبکہ اسٹائلس والے فونز میں اس فیچر کے لیے اسٹائلس کا استعمال بھی ممکن ہے۔دوسری جانب کوئک میژر ایپ موبائل کے کیمرے کو استعمال کرتے ہوئے مختلف اشیا، دیواروں اور دیگر جسمانی چیزوں کے فاصلے اور اندازاً حجم کی پیمائش کرنے میں مدد دیتی ہے۔

سام سنگ کے مطابق 31 دسمبر 2026 کے بعد ان ایپس کو نئی ڈیوائسز پر دستیاب نہیں کیا جائے گا اور مستقبل میں آنے والے آپریٹنگ سسٹم ورژنز کے لیے بھی ان کی سپورٹ ختم کردی جائے گی۔ رپورٹس میں امکان ظاہر کیا گیا ہے کہ ون یو آئی 9 کے مستحکم ورژن کے اجرا کے بعد یہ تبدیلی مزید واضح ہوسکتی ہے۔تاہم، جن صارفین کے موبائل فونز میں یہ ایپس پہلے سے انسٹال موجود ہیں، وہ ممکنہ طور پر انہیں استعمال کرتے رہ سکیں گے۔ البتہ یہ سہولت اس وقت تک برقرار رہنے کا امکان ہے جب تک متعلقہ ڈیوائس کا سافٹ ویئر ان ایپس کو سپورٹ کرتا رہے گا۔