اسلام آباد (این این آئی)پاکستان اور سعودی عرب نے خوراک کے چار اہم شعبوں میں تعاون بڑھانے کا فیصلہ کرلیا
جس کیلئے سعودی وزیر برائے ماحولیات و زراعت عبدالرحمن الفضلی جلد پاکستان کا دورہ کریں۔جمعرات کو وزارت اقتصادی امور کے مطابق وفاقی وزیر اقتصادی امور احد چیمہ کی زیر صدارت پاک سعودی عرب زرعی تجارت کے فروغ پر منعقدہ اہم جائزہ اجلاس میں وزیر اطلاعات عطا اللہ تارڑ، سیکرٹری کامرس، سیکریٹری فوڈ سیکیورٹی، چیئرمین سی ڈی اے اور وزارت خارجہ کے حکام نے شرکت کی۔اجلاس میں وزیر اقتصادی امور احد چیمہ نے بتایا کہ سعودی وزیر ماحولیات و زراعت عبدالرحمن الفضلی جلد پاکستان کا دورہ کریں گے،
ان کے دورے سے زرعی تجارت اور مشترکہ سرمایہ کاری کو بڑا فروغ ملے گا۔اجلاس میں بتایا گیا کہ سعودی وفد نیشنل ایگریکلچر ریسرچ سینٹر کا دورہ کرے گا جہاں وفد کو زرعی تحقیقی پہلووں پر بریفنگ دی جائے گی۔ اجلاس کو بتایا گیا کہ پاکستان اور سعودی عرب نے خوراک کے چار اہم شعبوں میں تعاون بڑھانے کا فیصلہ کیا ہے جن میں گوشت، چاول، پروسیسڈ فوڈ اور حیوانی چارے کے شعبے شامل ہیں۔
