کراچی(این این آئی)مرکنٹائل، جو کہ پاکستان میں ایپل کا مجاز ڈسٹری بیوٹر ہے، نے باضابطہ طور پر آئی فون 16 سیریز ملک میں متعارف کروادی ہے۔ اب یہ نئی آئی فون سیریز جاز کے ذریعے پیشگی آرڈر کے لیے دستیاب ہے، جس کے ساتھ اضافی بونس بھی شامل ہیں۔

جاز کی ویب سائٹ پر فونز کی قیمتوں کا ذکر نہیں کیا گیا ہے، لیکن توقع کی جا رہی ہے کہ بیس ماڈل آئی فون 16 کی قیمت 3,39,999 روپے، آئی فون 16 پلس کی قیمت 3,69,999 روپے، پرو ماڈل کی قیمت 4,79,999 روپے، اور پرو میکس کی قیمت 5,69,999 روپے ہوگی۔ یہ فون نومبر میں فروخت کیلئے دستیاب ہونے کی توقع کی جارہی ہے ۔آئی فون 16 سیریز ملک بھر میں جاز کے تمام بزنس سینٹرز پر دستیاب ہوگی، جس سے صارفین کے لیے خریداری کا ایک آسان تجربہ فراہم کیا جائے گا۔ اس کے ساتھ پی ٹی اے کی منظوری اور ایک محدود ایپل وارنٹی بھی شامل ہوگی جو کہ ملک میں ایپل کے مجاز سیلرز کے ذریعے قابل دعوی ہوگی۔

جاز اور مرکنٹائل ایک خصوصی ٹریڈ اِن پروگرام بھی متعارف کرائیں گے، جو موجودہ آئی فون صارفین کو بہترین قیمت پر اپنے پرانے فون کا تبادلہ کر کے نئے فیچرز سے لطف اندوز ہونے میں مدد دے گا۔ اس کے علاوہ جاز کی طرف سے مفت بنڈل پیکجز پیش کیے جائیں گے جن میں ای-سم کی مفت ایکٹیویشن، 200 جی بی ماہانہ ڈیٹا، اور 5000 آل نیٹ ورک منٹس (2000آف نیٹ اور 3000 آن نیٹ منٹس شامل ہیں)فراہم کیے جائیں گے۔

آئی فون 16 سیریز کے لیے دلچسپی کی رجسٹریشن اب کھلی ہے۔ ویب سائٹ پر رجسٹریشن اور بونس کے مزید تفصیلات بھی دی گئی ہیں۔ جو صارفین رجسٹریشن کراتے ہیں وہ خریداری پر ایپل کے خصوصی گفٹ کے لیے بھی قرعہ اندازی میں شامل ہو سکیں گے۔