لاہور( این این آئی) محکمہ ایکسائز اینڈ ٹیکسیشن نے گاڑیوں اورموٹر سائیکلوں کی ٹرانسفر فیسوں میں اضافہ کر دیا جبکہ نئی فیسوں کا اطلاق بھی کر دیا گیا ہے۔موٹر سائیکل کی ٹرانسفر فیس میں دو سو فیصد سے زائد اضافہ جبکہ 1500 سی سی سے زائد کی گاڑیوں کی رجسٹریشن فیس میں ایک فیصد کمی کر دی گئی، گاڑیوں کی رجسٹریشن پر فائلر اور نان فائلر کی شرح بھی بڑھا دی۔موٹر سائیکل کی ٹرانسفر فیس ڈیڑھ سو روپے سے بڑھا کر 500 روپے کر دی گئی، رکشہ کی ٹرانسفر فیس 1200 سے بڑھا کر 2500، ایک ہزار سی سی سے 1800 سی سی تک گاڑیوں کی ٹرانسفر فیس 2 ہزار سے بڑھا کر 5 ہزار اور 1800 سی سی سے زائد گاڑیوں کی ٹرانسفر فیس 3 ہزار کے بجائے 10 ہزار لی جائے گی۔

کمرشل گاڑیوں کی فیس 4 ہزار سے بڑھا کر 5 ہزار کر دی گئی، 2 ہزار سی سی سے زائد گاڑیوں کی رجسٹریشن کروانے والے بھی بھاری فیس دیں گے۔فائلر اور نان فائلر کے لئے ود ہولڈنگ ٹیکس کی شرح اب گاڑی کی ویلیو پر ہو گی، 2 ہزار سے 25 سو سی سی گاڑیوں کی قیمت کا 6 فیصد فائلر جبکہ نان فائلر 18 فیصد ادا کرے گا، 2500 سے 3 ہزار سی سی گاڑی کا ود ہولڈنگ ٹیکس فائلر کے لئے 8 فیصد اور نان فائلر کے لئے 24 فیصد ہو گا۔3 ہزار سی سی سے زائد گاڑیوں کا ٹیکس فائلر 10 فیصد جبکہ نان فائلر 30 فیصد ادا کرے گا۔