لاہور ( این این آئی) سبزیوں اور آٹے کی قیمت میں اضافے کے خلاف قرار داد پنجاب اسمبلی سیکرٹریٹ میں جمع کروا دی گئی ۔مسلم لیگ (ن) کی رکن اسمبلی سعدیہ تیمور کی جانب سے جمع کرائی گئی قرار داد میں کہا گیا ہے کہ لاہور میں سبزیوں کی قیمتیں اچانک آسمان کو چھو رہی ہیں، پیاز، ٹماٹر ،آلو و دیگر سبزیوں کی قیمت میں اضافہ ہوا ہے،عام مارکیٹ میں آٹے کی قلت تاحال برقرار ہے، صوبائی حکومت اور ضلعی انتظامیہ ضروریات زندگی کی اشیاکی قیمتیں سرکاری نرخوں پر فروخت کرانے میں ناکام ہیں، عام آدمی ناجائز منافع خوروں کے رحم و کرم پر ہیں، پرائس کنٹرول کمیٹیاں مکمل طور پر غیر فعال ہوچکی ہیں۔ قرار داد میں مطالبہ کیا گیا ہے کہ پرائس کنٹرول کمیٹیوں کو فوری فعال کیا جائے، اشیاضروریات کی سرکاری نرخوں کے مطابق فروخت یقینی بنائی جائے۔