اسلام آباد/لاہور( این این آئی)صدر مملکت ڈاکٹر عارف علوی سے لاہور چیمبر کے صدر میاں طارق مصباح کی سربراہی میں چھ رکنی وفد نے ملاقات کی جس میں بڑی پیشرفت ہوئی ہے۔ لاہور چیمبر کے مطالبے پر اسٹیٹ بینک نے بینکوں کو ہدایت کردی ہے کہ عیدالفطر کی چھٹیوں کے پیش نظر جمعہ کو ڈیپازٹ ہونے والے چیک

اسی روز کلیئر کریں اس سے تاجر برادری کو سہولت ملے گی۔ اس موقع پر ڈاکٹر علوی نے کہا ہے کہ حکومت منصفانہ کاروباری ماحول اور پائیدار معیشت کی تشکیل کے لئے پرعزم ہے۔ حکومت کاروباری اور معاشرے کے کمزورطبقات کیلئے اقدامات کر رہی ہے۔گزشتہ 10 ماہ کے دوران ملک کی برآمدات میں 13 فیصد اضافہ ہوا۔پاکستان کی برآمدات گزشتہ 10 ماہ میں 20 ارب ڈالر سے تجاوز کر گئیں۔ٹیکس محصولات کے3.6 کھرب روپے کے ہدف سے 143 ارب روپے زائد وصولیاں ہوئیں۔حکومت نے کورونا وبا میں کاروباری اور معاشرے کے کمزور طبقات کو 1.2 کھرب کا تاریخی محرک پیکج فراہم کیا۔ کورونا کے باوجود پاکستان کی معیشت نے اچھی کارکردگی کا مظاہرہ کیا۔ٹیکس وصولی اور برآمدات میں اضافہ معیشت کی بہتر کارکردگی کا ظاہر کرتا ہے،انہوں نے کہا کہ انفارمیشن ٹیکنالوجی کا فروغ وقت کی اہم ضرورت ہے۔ لاہور چیمبر کے صدر میاں طارق مصباح اور نائب صدر طاہر منظور چودھری نے صنعت و تجارت کو درپیش مسائل پر تفصیل سے روشنی ڈالی۔سابق ایگزیکٹیو کمیٹی رکن محمد ہارون اروڑہ۔ محمد جواد اور شاہد ندیم بھی اس موقع پر موجود تھے۔

موضوعات:اسٹیٹ بینک