کراچی(این این آئی) رواں مالی سال کے پہلے 7 ماہ جولائی تا جنوری کے دوران پاکستان میں براہ راست سرمایہ کاری(ایف ڈی آئی)کرنے والے ممالک میں چین سر فہرست جبکہ ناروے دوسرے اور مالٹا تیسرے نمبر پر رہا ہے۔اسٹیٹ بینک کے اعداد وشمار کے مطابق رواں مالی سال کے پہلے 7 ماہ جولائی تا جنوری کے دوران چین کی جانب سے 532.8 ملین ڈالر کی براہ راست سرمایہ کاری کی گئی ہے جبکہ گزشتہ مالی سال کی اسی مدت میں چین نے 282.6 ملین ڈالر کی ایف ڈی آئی
کی تھی۔ اس طرح چینی ایف ڈی آئی میں 250.2 ملین ڈالر کا نمایاں اضافہ ریکارڈ کیا گیا ہے۔ ایس بی پی کے مطابق ناروے نے پاکستان میں 288.5 ملین ڈالر کی براہ راست غیر ملکی سرمایہ کاری کی ہے جبکہ گزشتہ مالی سال ناروے سے 3.9 ملین ڈالر کی ایف ڈی آئی کی گئی تھی،اسی طرح مالٹا کے سرمایہ کاروں کی جانب سے پاکستان میں کی جانے والی براہ راست غیر ملکی سرمایہ کاری کا حجم 81.6 ملین ڈالر کے مقابلے میں 129.6 ملین ڈالر تک بڑھ گیا۔
