اسلام آباد(نیوز ڈیسک)  متحدہ عرب امارات کی حکومت نے نبی کریم ﷺ کے یومِ ولادت کے موقع پر 28 اگست 2026 کو سرکاری تعطیل کا اعلان کردیا ہے۔ دوسری جانب پاکستان میں محکمہ موسمیات نے ربیع الاول 1448 ہجری کے چاند کی ممکنہ تاریخوں کے حوالے سے پیش گوئی جاری کردی ہے۔

عرب میڈیا کے مطابق یو اے ای کے سرکاری میڈیا آفس نے بتایا ہے کہ جمعہ 28 اگست کو ملک بھر میں سرکاری اور نجی شعبے کے ملازمین کے لیے عید میلادالنبی ﷺ کے سلسلے میں تعطیل ہوگی۔

جن ملازمین کی ہفتہ وار چھٹی ہفتہ اور اتوار کو ہوتی ہے، انہیں 28 اگست سے 30 اگست تک مسلسل تین روز آرام کا موقع ملے گا۔

پاکستان میں ربیع الاول کے چاند کی متوقع تاریخ

ادھر محکمہ موسمیات پاکستان کے مطابق ربیع الاول 1448 ہجری کا چاند 13 اگست کی شام نظر آنے کا امکان نہیں۔ محکمہ موسمیات کی پیش گوئی کے مطابق یکم ربیع الاول ہفتہ 15 اگست کو ہوسکتا ہے، جبکہ 12 ربیع الاول بدھ 26 اگست کو آنے کا امکان ظاہر کیا گیا ہے۔

تاہم ربیع الاول کے آغاز اور عید میلادالنبی ﷺ کی حتمی تاریخ کا فیصلہ چاند کی شرعی رویت کے بعد مرکزی رویتِ ہلال کمیٹی کرے گی۔

پاکستان میں سرکاری تعطیل 25 اگست کو

حکومت پاکستان کی جانب سے 2026 کی سرکاری، بینک اور اختیاری تعطیلات کا شیڈول بھی جاری کیا جاچکا ہے۔ اس شیڈول کے مطابق عید میلادالنبی ﷺ کے موقع پر منگل 25 اگست کو سرکاری تعطیل مقرر کی گئی ہے۔

حتمی تاریخ کے حوالے سے تاہم مرکزی رویتِ ہلال کمیٹی کا فیصلہ ہی حتمی تصور کیا جائے گا۔

اگست میں تین روزہ تعطیلات کا موقع

اگست 2026 میں پاکستانی شہریوں کو متعدد تعطیلات میسر آنے کی توقع ہے۔ ماہِ اگست میں یومِ آزادی سمیت دو وفاقی تعطیلات اور ہفتہ وار تعطیلات شامل ہونے کے باعث مجموعی طور پر کئی چھٹیوں کا موقع بن رہا ہے۔

یومِ آزادی پاکستان 14 اگست بروز جمعہ منایا جائے گا، جس کے بعد ہفتہ اور اتوار کی معمول کی ہفتہ وار تعطیلات ہوں گی۔ اس طرح شہریوں کو مسلسل تین دن کی چھٹی ملنے کا امکان ہے، جس سے وہ تقریبات، تفریح یا خاندان کے ساتھ وقت گزارنے کا منصوبہ بنا سکتے ہیں۔