کراچی(این این آئی)لائنزایریا کا علاقہ ٹونیشیا لائن بہت بڑی تباہی سے بچ گیا،ہفتہ اور اتوارکی درمیانی شب ٹوٹی ہوئی گیس پائپ لائن ٹوٹنے سے آگ بھڑک اٹھی،گیس پائپ لائن میں آگ بھڑکنے سے علاقے میں خوف وہراس پھیل گیا،سوتے ہوئے مکین ہڑبڑا کر اٹھ بیٹھے تاہم سوئی گیس کا عملہ خواب غفلت سے نہ جاگ سکا،علاقہ مکینوں نے اپنی مدد آپ کے تحت آگ پر قابو پایا،سوئی گیس عملے کی جانب سے

ٹونیشیالائن میں 2جگہ سے ٹوٹی ہوئی گیس پائپ لائنوں کو گزشتہ 3 روز سے جوڑا نہ جاسکا،مکینوں نے پائپ لائنوں کی فوری مرمت کرکے علاقے کو مزید کسی بڑے نقصان سے بچانے کے لئے اپیل کردی۔ تفصیلات کے مطابق لائنزایریا یونین کمیٹی نمبر 9 میں 13 فروری بروز جمعرات سیوریج لائن کی کھدائی کے دوران غفلت برتے ہوئے تین جگہوں سے گیس پائپ لائن توڑ دی گئی موقع پر موجود مکینوں نے سوئی گیس عملے کو شکایت درج کروادی تھی جس کا شکایت نمبر 2809965813 ہے۔ تاہم سوئی گیس عملے نے 14 فروری بروز جمعہ کو صرف ایک جگہ پر ہی روز گیس پائپ لائن مرمت کرکے چلے گئے اور باقی 2 جگہوں پر ٹوٹی ہوئی گیس پائپ لائن کو ایسے ہی چھوڑ دیا گیا۔ہفتہ کو بھی سوئی گیس ہیلپ لائن پر دوسری مرتبہ شکایت نمبر 9671998229 درج کروائی گئی۔ ہفتہ اور اتوار کی درمیانی شب ٹونیشیالائن میں ناگوری دودھ والا اور ہوٹل کے سامنے گڑھے میں ٹوٹی ہوئی گیس پائپ لائن میں آگ بھڑک اٹھی۔ آگ بھڑکتی دیکھ کر سوتے ہوئے علاقہ مکین ہڑبڑا کر اٹھ بیٹھے اور اپنی مدد آپ کے تحت مکینوں نے گیس پائپ لائن میں لگی ہوئی آگ کو بجھایا۔ مکینوں کے مطابق سوئی گیس کا عملہ مسلسل غفلت برت رہا ہے۔ شکایات درج کروانے کے باوجود تعاون عمل درآمد نہیں کیا جارہا۔مکینوں کا کہنا ہے کہ سوئی گیس عملے کی غفلت کسی بھی انسانی جان کے ضیاع اور علاقے میں کسی بڑی نقصان کا باعث بھی بن سکتا ہے۔ مکینوں نے اپیل کی ہے کہ ٹونیشیا لائن میں دونوں جگہوں پر ٹوٹی ہوئی گیس پائپ لائن کی فوری مرمت کی جائے۔

موضوعات:لائنزایریا کا علاقہ ٹونیشیا