ریاض (این این آئی)سعودی عرب کے دارالحکومت الریاض میں پولیس نے چاولوں میں ملاوٹ کا ایک نیا اور انوکھا دھند بے نقاب کرتے ہوئے چار غیرملکی جعل ساز نوسر بازوں کو حراست میں لے کران سے تفتیش شروع کردی ہے۔عرب ٹی وی کے مطابق سعودی عرب کی وزارت تجارت وسرمایہ کاری کی ٹیم نے پولیس کے ہمراہ الریاض میں ایک گھر میں چھاپہ مارا جہاں پر بڑی تعداد میں
اعلیٰ معیار کے چاول کے خالی بیگ خیرہ کیے گئے تھے۔ اس کے علاوہ وہاں پر غیرمعیاری چاول کی ان مشہور برانڈ کے چاول کے تھیلوں میں پیکنگ، سیل اورترسیل کی جا رہی تھی۔پولیس کا کہنا تھا کہ چاولوں کی دھوکہ دہی اور جعل سازی میں ملوث چار ملزمان کو گرفتار کیا گیا ہے۔ ملزمان دارالحکومت کے مختلف ہوٹلوں اور دکانوں سے اعلیٰ معیار کے چاولوں کے خالی ہونے والے تھیلے جمع کرتے۔ اس کے بعد انہیں ایک مکان میں لے جاتے جہاں ان میں غیرمعیاری چاول پیک کرکے ان پرمشہور برانڈ کی مہر لگائی جاتی اور پھر مہنگے داموں فروخت کیے جاتے۔پولیس نے چھاپے کے دوران 19 ہزار 500 خالی بیگ ضبط کیے ہیں۔ ان میں غیرمعیاری چاول پیک کرنے کے بعد اعلیٰ برانڈ کے چاول کی مہر لگائی جاتی اور انہیں سیل کردیا جاتا۔وزرات تجارت وسرمایہ کاری کمیٹی کے چیئرمین اور مشترکہ سیکیورٹی مہم کے انچارج صالح العنزی نے بتایا کہ ملزمان غیرمعیاری چاول شہرکی چھوٹی اور پرچون سامان فروخت کرنے والی دکانوں کو فروخت کرکے ان سے اعلیٰ معیار کے چاول کے پیسے بٹورتے رہے ہیں۔
