لاہور( این این آئی )یونائیٹڈ بزنس گروپ (یو بی جی) نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے سالانہ انتخابات کے لئے ملک بھر میں انتخابی مہم کے تیسرے دور کا آغاز کردیا ۔ اس سلسلے میں لاہور چیمبر آف کامرس کے سابق صدر شہزاد علی ملک کی جانب سے بزنس کمیونٹی کے لئے دیئے گئے استقبالیہ سے خطاب کرتے ہوئے یو بی جی کے چیئرمین اور سارک چیمبر کے سینئر نائب صدر افتخار علی نے کہا کہ گروپ کو ملک بھر کے مختلف چیمبرز سے اب تک 85 فیصد سے زیادہ بھاری اکثریت کی حمایت حاصل ہو چکی ہے۔ انتخابی مہم کے تیسرے
دور کے لئے ایک ورکنگ پلان تیار کیا گیا ہے، تمام قائدین اور کارکنان پوری طرح میدان عمل میں اتر آئے ہیں اور بھر پور انداز سے الیکشن مہم کا آغاز کردیا ہے۔ انہوں نے کہا کہ یو بی جی معاشی سرگرمیوں کے فروغ، عوام کی بہبود و خوشحالی اور تاجر برادری کے مفادات کے تحفظ کے لئے کوششیں اور اقدامات جاری رکھے گا۔ افتخار علی ملک نے کہا کہ ٹریڈ پالیٹکس میں صرف جمہوریت ہی غالب ہے اور محنت اور لگن کے ساتھ کام کرنے والے بزنس مینوں کو ذمہ داریاں دی گئی ہیں تاکہ وہ ایف پی سی سی آئی کی امیج بلڈنگ اور تاجر برادری کو درپیش معاملات کے حل میں اپنا کردار ادا کرسکیں۔
