اسلام آباد(این این آئی) اسلامی ترقیاتی بینک نے نوجوانوں کی فلاح و بہبود میں پاکستان کا شراکت کار بننے کا فیصلہ کرلیا ہے ۔ جمعہ کو اسلامی ترقیاتی بینک کے اعلی سطح وفد نے اسلام آباد میں وزیراعظم کے معاون خصوصی برائے یوتھ افئیرز عثمان ڈار سے اہم ملاقات کی جس میں صدر اسلامی ترقیاتی بینک کے مشیر ولید الووحیب اور دیگر حکام وفد میں شامل تھے ۔عثمان ڈار نے بینک حکام کو نوجوانوں سے متعلق مختلف منصوبوں پر بریفنگ دی ۔بینک حکام نے
کامیاب نوجوان پروگرام میں گہری دلچسپی کا اظہار کیا۔ حکام نے کہاکہ منصوبے کو کامیاب بنانے کے لئے پاکستان سے اشتراک اور تعاون پر تیار ہیں ۔عثمان ڈار نے کہاکہ وزیراعظم جلد کامیاب جوان پروگرام کا آغاز کرنے جا رہے ہیں۔انہوںنے کہاکہ حکومت پاکستان بھی خطیر رقم نوجوانوں پر خرچ کرے گی۔انہوںنے کہاکہ وزیراعظم اور وفاقی کابینہ خود منصوبے پر غور کر رہے ہیں۔انہوںنے کہاکہ کابینہ سے منظوری کے ساتھ ہی پاکستان بھر میں پروگرام کا آغاز کر دیا جائیگا۔
