لاہور( این این آئی)اکبر ی منڈی کے تاجروں اور مرکزی کریانہ مرچنٹ ایسوسی ایشن نے شیخوپورہ اور لاہور میں چینی کی فروخت کیلئے طے کردہ سرکاری نرخوں میں تفریق پر اپنی تشویش کا اظہار کرتے ہوئے کہا ہے کہ اس اقدام سے رمضان المبارک میں چینی کا بحران پیدا ہونے کا خدشہ ہے ،ایکس مل اور ٹرانسپورٹیشن کے اخراجات کے بعد فی کلو قیمت 64.65روپے بنتی ہے لیکن ہمیں 60روپے فی کلو

فروخت کا پابند کر کے مجسٹریٹس کے ذریعے بھاری جرمانے کئے جارہے ہیں ۔ اکبر ی منڈی کے تاجروں اور مرکزی کریانہ مرچنٹ ایسوسی ایشن کے اجلاس میں حاجی اسلم، حافظ عارف، طاہر ثقلین بٹ ،شیخ رشیدسمیت دیگر تاجروں نے شرکت کی ۔ مرکزی کریانہ مرچنٹ ایسوسی ایشن کے جنرل سیکرٹری طاہر ثقلین بٹ نے گفتگو کرتے ہوئے کہا کہ شیخوپورہ میں چینی کی فی کلو قیمت 65روپے جبکہ لاہور کیلئے 60روپے مقرر کی گئی ہے جو کسی طرح بھی قابل قبول نہیں ۔ شوگر ملوں سے خریداری کے بعد صرف ٹرانسپورٹیشن کے اخراجات سے فی کلو قیمت 64.65روپے بنتی ہے لیکن ہمیں 60روپے فی کلو فروخت کا پابند کیا جارہا ہے۔ انہوں نے کہا کہ مجسٹریٹس صرف چینی پر چالان کر رہے ہیں جس کی وجہ سے تاجروں اور دکانداروں میں شدید خوف و ہراس پایا جاتا ہے اور اگر حکومت نے رمضان المبارک سے قبل اس کے تدارک کیلئے اقدامات نہ کئے تو چینی کا بحران پیدا ہونے کا خدشہ ہے ۔ انہوں نے کہا کہ حکومت کی جانب سے رمضان بازاروں ، یوٹیلٹی سٹورز اور فیئر پرائس شاپس پر اربوں روپے کی سبسڈی دی جارہی ہے جبکہ عوام کی اکثریت بازاروں اور گلی محلے کی سطح پر دکانوں سے خریداری کرتے ہیں ۔ ہمارا مطالبہ تھاکہ حکومت شوگراورفلور ملوں سمیت دیگر انڈسٹریز کو براہ راست سبسڈی دے جس سے عوام کی بڑی تعداد نے براہ راست مستفید ہونا تھا ۔

موضوعات:تاجر