لاہور(این این آئی )ایران پاک فیڈریشن آف کلچر اینڈ ٹریڈ کے صدر خواجہ حبیب الرحمان نے کہا ہے کہ پاکستان میں تمام مسائل کی اصل وجہ کرپشن زدہ معیشت ہے، ہمارا تمام تر تجارتی اور صنعتی نظام کرپشن زدہ ہو چکا ہے، بدعنوان عناصر کی کامیابیوں نے پوری قوم کو دولت کمانے کی

دوڑ میں مگن کر دیا ہے، جائز اور ناجائز کی تفریق ختم ہو چکی ہے جس نے ملکی معیشت کو مکمل طور پر کھوکھلا کر دیا ہے،آج تک کسی بھی حکومت نے اس عفریت سے نمٹنے کیلئے کوئی ٹھوس پروگرام بنایا اور نہ ہی کوئی سنجیدہ کوشش کی ہے، تجارتی اور صنعتی نظام سے کرپشن کا ناسور ختم ہو جائے تو ملک تیزی سے ترقی کے راستے پر گامزن ہو سکتا ہے۔ان خیالات کا اظہار انہوں نے گزشتہ روز ایف پی سی سی آ ئی کے زیراہتمام منعقدہ تقریب سے خطاب کرتے ہوئے کیا۔ انہوں نے کہا کہ ہماری قوم اور اداروں نے دہشتگردی کے خلاف اعصاب شکن جنگ جیتی ہے، ملک کی سالمیت کے خلاف کام کرنے والی نادیدہ قوتوں کو بھی ہر محاذ پر شکست فاش دی ہے، اگر کرپشن زدہ نظام کے خلاف جنگ لڑنے کا عزم لے کر حکومت، ریاستی ادارے اور قوم ایک پیچ پر کھڑی ہو جائے تو کوئی وجہ نہیں کہ کرپشن زدہ معیشت کو ٹھیک نہ کیا جا سکے۔ خواجہ حبیب الرحمان نے مزید کہا کہ معیشت کی اصلاح ہو گی تو ملک کو مضبوط بنیادیں میسر آئیں گی اور اس کے لئے عملی اقدامات اٹھانے کی ضرورت ہے ۔