اسلام آباد(مانیٹرنگ ڈیسک)وفاقی وزیرپانی وبجلی خواجہ آصف نے کہاہے کہ سکی کیناری منصوبے پر تعمیری کام آئندہ دو سے تین ماہ میں شروع ہو گا اور منصوبے کیلئے دو ہزار سات سو ترانوے کینال زمین خرید لی ہے ۔ لوڈ شیڈنگ کے خاتمے کیلئے کافی سفر طے کر لیا،دوہزار اٹھارہ میں لوڈ شیڈنگ کے خاتمے کی طرف سفر جاری ہے۔
اسلام آباد میں صحافیوں سے گفتگو کرتے ہوئے وزیرپانی وبجلی نے کہاکہ ایک ارب تیس کروڑ سالانہ کے پی کے کو رائلٹی کی مد میں ملیں گے۔انہوں نے کہاکہ نندی پور کو گیس پر منتقل کرنے کا کام جاری ہے اور کوشش ہے کہ نندی پور کو اپریل میں گیس پر آپریشنل کر دیں۔ خواجہ آصف نے کہاکہ چشمہ تھری تین سو چالیس میگاواٹ کا آپریشنل ہو چکا ہے اور توقع ہے چشمہ فور اپریل میں سسٹم میں آجائے گا۔انہوں نے کہاکہ دیامر بھاشا ڈیم کو دو حصوں میں تقسیم کیا ہے آبی ذخیرہ اور پاور ہاؤس،پلان ہے کہ آبی ذخیرہ اپنے وسائل سے تعمیر کریں۔انہوں نے کہاکہ زمین کی خریداری کیلئے ایک ارب ڈالر خرچ کر چکے ہیں ۔مختلف ممالک نے دیامیر بھاشا ڈیم میں دلچسپی کا اظہار کیا ہے۔دیامر بھاشا ڈیم منصوبے کیلئے زمین خریداری کا کام مکمل ہو چکا ہے توقع ہے رواں سا ل اس منصوبے پر کام شروع ہوجائیگا۔
وفاقی وزیر نے کہاکہ نیلم جہلم منصوبہ رواں سال آپریشنل ہو جائے گا۔انہوں نے کہاکہ بجلی چوری پورے پاکستان کا. مسئلہ ہے،واٹر پالیسی کو مشترکہ مفادات کونسل میں لیکر جائیں گے۔
