کراچی( آن لائن ) پاکستان اسٹیٹ آئل (پی ایس او) نے کچھ حلقوں کی جانب سے قائم کیے گئے اس تاثر کی نفی کی ہے کہ حکومت پاکستان کی جانب سے اعلیٰ معیار کے پٹرول کی درآمد کے فیصلے اور تمام آئل مارکیٹنگ کمپنیوں کی جانب سے اس پر عملدرآمد سے آئندہ دنوں میں ملک میں پٹرول کی قلت پیدا ہوسکتی ہے۔ پی ایس او نے عوام کو یقین دہانی کرائی ہے کہ کمپنی کے پاس پہلے ہی پٹرول وافر مقدار میں موجود ہے اور ملک بھر کے کسی بھی پی ایس او پٹرول پمپ پر ایندھن کی قلت کا امکان نہیں ہے۔
یاد رہے کہ اس سے قبل اوگرا نے یکم نومبر سے عوام پر پٹرول بم گرانے کی تیاریاں کرلیںہیں ، پٹرولیم مصنوعات کی قیمتوں میں اضافے کی سمری تیار کرلی گئی ہے۔ تفصیلات کے مطابق عالمی مارکیٹ میں خام تیل کی قیمت پچاس ڈالر فی بیرل ہونے کے بعد اوگرا نے ملک میں پٹرولیم مصنوعات مہنگی کرنے کی سمری تیار کرلی ہے۔ اوگرا کی جانب سے یکم نومبر سے ڈیزل 6روپے69پیسے، مٹی کا تیل3روپے 97پیسے، لائٹ ڈیزل4روپے سینتالیس پیسے اور پٹرول پچاسی پیسے مہنگا کرنے کی تجویز دی ہے۔ حتمی فیصلہ وزارت خزانہ کرے گی۔سمری کی منظوری کی صورت میں نئی قیمتوں کا اطلاق یکم نومبر سے ہوگا۔