اسلام آباد(نیوز ڈیسک) وفاقی وزیر تجارت انجینئر خرم دستگیر خان نے کہا ہے کہ پاکستان سے فارماسیوٹیکل کی برآمدات میں اضافے کے لیے فارماسیوٹیکل ایکسپورٹ ڈیولپمنٹ کونسل قائم کی جائے گی۔اس میں فارما کی صنعت، وزارت تجارت اور ہیلتھ ریگولیشن کے نمائندے شامل ہوں گے، کونسل کے قیام کیلئے قانونی اور انتظامی تقاضے پورے کیے جارہے ہیں، کونسل فارما کی برآمدات کیلئے عالمی سرٹیفکیشن، مقامی رجسٹریشن اور انڈسٹری کو درپیش مسائل کے حل کیلئے اقدامات تجویز کرے گی۔پاکستان فارماسیوٹیکل مینوفیکچررز ایسوسی ایشن (پی پی ایم اے) کے وفد سے ملاقات کے دوران انہوں نے کہا کہ فارما سیکٹر کی برآمدات میں اضافہ وزارت تجارت کی ترجیحات میں شامل ہے اور اس کی راہ میں حائل رکاوٹیں دور کی جائیں گی۔ وفاقی وزیر نے وفد کو فارما انڈسٹری کیلئے عالمی معیار کی سرٹیفکیشن حاصل کرنے کی ترغیب دی اور وزارت تجارت کی طرف سے تعاون کا یقین دلایا