کراچی (نیوز ڈیسک) جمہوریت کے نام پر نام نہاد بھارت میں گائے کو ذبح کرنے پر بیشتر ریاستوں پر پابندی عائد ہے، اس کے باوجود گزشتہ دو سال سے بھارت دنیا بھر میں گائے کے گوشت برآمد کرنے والی فہرست میں پہلے نمبر پر ہے۔ بھارت میں گائےکو ذبح کرنے ،گوشت فروخت کرنے پر انتہائی سزا سات سال قید اور ایک لاکھ روپے جرمانہ ہے۔ بھارت میں گائے کو ذبح کرنے یا اس کا گوشت فروخت کرنے پر درجنوں افراد ہلاک کردیئے گئے جبکہ فسادات بھی ہوئے۔ بھارت نے 2015ء میں دو ارب کلوگرام گائے کا گوشت برآمد کیا جس کی مالیت 4 ارب 80 کروڑ ڈالر تھی جبکہ ذبح شدہ گائے کی مجموعی تعداد ایک کروڑ 70 لاکھ سے زائد تھی۔ 2014ء میں بھارت نے 20 لاکھ 32 ہزار میٹرک ٹن گائے کا گوشت برآمد کیا۔ دوسرے نمبر پر آسٹریلیا ہے،جس نے 2015ء میں 18 لاکھ 15 ہزار میٹرک ٹن جبکہ تیسرے نمبر پر برازیل نے 16 لاکھ 25 ہزار میٹرک ٹن گوشت برآمد کیا۔ پاکستان 14 ویں نمبر پر رہا جس نے 65 ہزار میٹرک ٹن گائے کا گوشت برآمد کیا۔ اہم بات یہ ہے کہ بھارت کے گوشت برآمد کنندگان ہندو ہیں۔جنگ رپورٹراسد ابن احسن کے مطابق بھارتی گائے کا گوشت سعودی عرب اور عرب امارات میں مسلم ناموں والی کمپنیاں جن کے مالک ہندو ہیں، برآمد کرتی ہیں۔ ان کمپنیوں میں النور ایکسپورٹ، الکبیر ایکسپورٹ اور عربین ایکسپورٹ شامل ہیں۔ الکبیر ایکسپورٹ کے مالکان ستیش سبروال اور اتل سبروال ہیں۔ الکبیر ایکسپورٹ، یو اے ای میں طبیۃ الامارات کے نام سے یہ گوشت دکانوں پر سپلائی کرتی ہے جبکہ اسی کمپنی کا ایک نام تبرک بھی ہے۔ یہی کمپنی جاپان میں سیمورائی اور برطانیہ میں فیلکن فوڈ کے نام سے گوشت برآمد کرتی ہے۔ بھارتی گائے کا گوشت چین بھر میں فروخت ہوتا ہے مگر چین میں گوشت ویتنام کے ذریعے اسمگل کیا جاتا ہے۔ پورے بھارت میں مجموعی طور پر 30 ہزار غیر قانونی جبکہ 600 قانونی مذبح خانے ہیں، صرف آندھرا پردیش میں 3 ہزار غیر قانونی اور صرف 6 قانونی مذبح خانے ہیں، 2012ء میں 3 ہزار 643 ملین میٹرک ٹن گائے کے گوشت کی پیداوار ہوئی ،جس میں سے ایک ہزار 963 میٹرک ٹن بھارت میں ہی استعمال ہوا جبکہ ایک ہزار 680 ملین میٹرک ٹن برآمد کیا گیا۔