اسلام آباد(نیوز ڈیسک) پاکستان چائینہ جوائنٹ چیمبر آف کامرس اینڈ انڈسٹری (پی سی جے سی سی آئی) کے صدر شاہ فیصل آفریدی نے کہا ہے کہ پاک چین اقتصادی راہداری کے منصوبوں پر عمل درآمد کیلئے ہنر مند افرادی قوت کی فراہمی پر خصوصی توجہ دینے کی ضرورت ہے اور اس حوالے سے غیر ہنر مند افراد کو ہنر مندافرادی قوت میں بدلنے کیلئے خصوصی اقدامات کرنے چاہئیں اپنے ایک بیان میں انہوں نے کہا کہ چین نے موٹر ویز پر خصوصی اقتصادی زونز قائم کرنے کی منصوبہ بندی کی ہے جس کیلئے سالانہ 20ہزار سے زائد ہنر مندافرادی قوت کی ضرورت ہوگی۔ انہوں نے کہا کہ لاہور میں اورنج لائن میٹرو ٹرین پراجیکٹ پر پانچ ہزار کے قریب چینی ورکر اور انجینئر کام کرینگے ۔ انہوں نے کہا کہ چین کے چیمبر آف کامرس کی مشاورت سے ہنر مند افرادی قوت کی ضرورت اور دستیابی میں موجود فرق کو ختم کرنے کیلئے کام کر رہے ہیں اور اس حوالے سے صوبائی حکومتوں سے مشاورت کی جا رہی ہے کہ پیشہ وارانہ اور تکنیکی تربیت کی فراہمی کے اداروں کو مزید فعال بنا کر ہنر مند افرادی قوت کی فراہمی میں اضافہ کیا جائے جس سے چائینا پاکستان اقتصادی راہداری کے منصوبہ سے خاطر خواہ استفادہ کیا جا سکے گا اور اسی سے ملکی معیشت پر خوشگوار اثرات مرتب ہونگے۔