اسلام آباد(نیوز ڈیسک)اسٹیٹ بینک آف پاکستان کی جانب سے کے اے ایس بی(کسب) بینک کے حوالے سے وضاحت کے بعد ایس ای سی پی نے کسب بنک کے حصص میں غیر معمولی لین دین کے مشاہدے کے بعد کسب بینک کے حصص کی ٹریڈنگ معطل کر دی ہے، سرمایہ کاروں کے تمام حصص کی سیٹلمنٹ ان کے سب اکاﺅنٹ میں کر دی جائےگی،سیکیورٹیز اینڈ ایکس چینج کمیشن آف پاکستان کی جانب سے یہ اقدام سرمایہ کاروں کے تحفظ کے پیش نظر کیا گیا۔اسٹاک مارکیٹ میں کسب بنک کی مینجمنٹ کے تبدیل ہونے کی خبر پھیلنے کے بعد اس کے حصص کی خرید و فروخت میں اضافہ ہوا ہے۔ ایس ای سی پی نے بینک کی مینجمنٹ سے اس بارے میں وضاحت طلب کی ۔بنک نے واضح کیا کہ بنک کو اس وقت وفاقی حکومت کی جانب سے لگائی گئی پابندی کے تحت ہی چلایا جا رہا ہے اور بینک انتظامیہ کو مینجمنٹ کی تبدیلی کے حوالے سے کچھ علم نہیں ۔ بینک کی اس وضاحت کے باوجود بنک کے حصص میں تیزی جاری رہی۔29 اپریل کو بینک اسلامی پاکستان اور کسب بنک کی جانب سے دونوں بنکوں کے انضمام کا اعلان کیا گیاتھا لیکن اسٹیٹ بینک کے ترجمان نے جمعرات کویہ وضاحت کردی ہے کہ بینک اسلامی کے ساتھ نہ توکسب بینک کے انضمام کا ابھی تک کوئی فیصلہ ہوا ہے اور نہ ہی یہ بینک چینی سرمایہ کے حوالے کرنے کے بارے میں کوئی بات چیت جاری ہے اور تمام تر باتیں صرف افواہیں ہیں ،تاہم اسٹیٹ بینک کے ترجمان نے یہ اشارہ ضرور دے دیا ہے کہ اکسب بینک کا بینک اسلامی کے ساتھ انضمام کا معاملہ حتمی منظوری کیلئے وفاقی حکومت کے پاس ہے اور بینک اسلامی کسب بینک کو مضبوطی سے چلانے کی اہلیت رکھتا ہے۔