لاہور ( نیوزڈیسک) لاہور ہائیکورٹ نے میرٹ کے برعکس ترک کمپنی کو بجلی سپلائی لائن کا ٹھیکہ فراہم کرنے کے خلاف دائر درخواست پر نیشنل ٹرانسمیشن اینڈ ڈسپیچ کمپنی کو نوٹس جاری کرتے ہوئے 30 اپریل کوجواب طلب کر لیا۔گزشتہ روز جسٹس محمد فرخ عرفان خان نے کیس کی سماعت کی۔درخواست گزار کی جانب سے موقف اختیار کیا گیا کہ ترک کمپنی مزدرفر کو قانونی طریقہ کار سے ہٹ کر 70 کروڑ روپے کی بجلی سپلائی لائن کا ٹھیکہ فراہم کر دیا گیاہے۔ترک کمپنی نے تجربے کے جعلی کاغذات بنا کر متعلقہ حکومتی اداروں کو دئیے جو کہ قومی خزانے کو بڑے پیمانے پر بھاری نقصان پہنچانے کے مترادف ہے۔ عدالت نے درخواست گزار کا موقف سننے کے بعد نیشنل ٹرانسمیشن اینڈ ڈسپیچ کمپنی( این ٹی ڈی سی )کو نوٹس جاری کرتے ہوئے30 اپریل کو جواب طلب کر لیا۔