کراچی(نیوزڈیسک)ملک بھر میں سموں کی بائیو میٹرک تصدیق شروع ہونےکے بعد موبائل فون استعمال کرنے والوں کی بڑھتی تعداد کو ریورس گیئر لگ گیا ہے۔گزشتہ ماہ سیلو لر فون استعمال کرنے والوں کی تعداد میں 17 لاکھ کی کمی ریکارڈ کی گئی ۔پی ٹی اے کے مطابق مارچ 2015 میں ملک بھر کے موبال فون استعمال کرنے والوں کی تعداد گھٹ کر 13کروڑ 49 لاکھ رہ گئی جوکہ فروری 2015 میں تقریبا 13کروڑ 66 لاکھ تھی ۔دہشت گردی میں سموں کا استعمال روکنے کیلئے حکومت کی جانب سے ان کی بائیو میٹرک تصدیق کا عمل متعارف کروایا گیا تھا جس کی آخری تاریخ 12 اپریل تھی اس صورت حال کے بعد سموں کی تعداد میں نمایاں کمی دیکھی جا رہی ہے ۔اس سے قبل ملک میں موبائل فون استعمال کرنے والوں کی تعداد میں سالانہ لاکھوں کااضافہ ریکارڈ کیا جا رہا تھا ۔ ماہرین کا کہنا ہے کہ آئندہ چند ماہ میں سموں کی تعداد میں مزیدکئی لاکھ کی کمی کا امکان ہے۔