اسلام آباد (نیوز ڈیسک ) اسلام آباد میں متعین سعودی عرب کے سفیر عبداللہ مزروک الظہرانی آج سعودی عرب روانہ ہو جائینگے۔ مسجد الحرام کے اندر تعمیراتی کاموں میں مصروف کرین پر آسمانی بجلی گرنے کے باعث صفا کے مقام پر کرین گرنے سے درجنوں عازمین حج و عمرہ شہید ہوگئے ہیں۔ اس افسوسناک واقعہ پر سعودی سفیر نے اپنی طرف سے سعودی سفارتخانے کی طرف سے اور سعودی حکومت کی طرف سے گہرے دکھ اور رنج کا اظہار کیا ہے۔ سعودی سفیر عبداللہ الظہانی نے پاکستان کے وزیراعظم نوازشریف انکے وزراء پاکستانی قوم پاکستان کے سیاسی قائدین کی طرف سے اس سانحہ پر ہمدردی کے جو پیغامات دئیے ہیں اس پر انہوں نے شکریہ ادا کیا۔ سعودی سفیر اب حج کے بعد اسلام آباد واپس آئینگے ان کی عدم موجودگی میں ڈپٹی ہیڈ آف مشن جاسم الخالدی قائم مقام سفیر کے فرائض منصبی ادا کرینگے۔ یاد رہے کہ جاسم الخالدی سابق سعودی سفیر کی معیاد ختم ہونے کے بعد تقریباً ایک سال تک قائم مقام سفیر کی ذمہ داریاں احسن طریقے سے سرانجام دیتے رہے۔ سعودی سفیر نے شہید ہونے والے عازمین حج کے لواحقین عزیز و اقارب اور سوگوار خاندانوں کے ساتھ اپنی طرف سے سعودی سفارتخانے اور سعودی حکومت کی طرف سے دلی تعزیت بھی کی ہے۔