کراچی (این این آئی)پاکستان سپر لیگ ( پی ایس ایل) کے آٹھویں ایڈیشن میں پہلی کامیابی حاصل کرنے پر شاہد آفریدی کراچی کنگز کے کھلاڑیوں کو مبارکباد دینے میدان میں پہنچے اور انہیں گلے بھی لگایا۔گزشتہ روز پاکستان سپرلیگ کے میچ میں کراچی کنگز نے ابتدائی تین میچز میں مسلسل شکست
کے بعد بالآخر چوتھے میچ میں پہلی کامیابی حاصل کرلی۔کراچی کنگز کی جانب سے دیے گئے 186 رنز کے ہدف کے تعاقب میں لاہور قلندرز کی ٹیم 18 ویں اوور میں 118 رنز بنا کر آؤٹ ہوئی۔یوں کراچی کنگز نے لاہور قلندرز کو باآسانی 67 رنز سے شکست دی۔پی ایس ایل 8 میں پہلی کامیابی حاصل کرنے پر پاکستان کرکٹ ٹیم کے سابق کپتان شاہد آفریدی نے کراچی نیشنل بینک کرکٹ ارینا میں کراچی کنگز کے کھلاڑیوں سے اسٹیڈیم میں ملاقات کی۔اس دوران انہوں نے کھلاڑیوں کو گلے لگایا اور کامیابی پر مبارک باد بھی دی۔میڈیا سے گفتگو کرتے ہوئے شاہد آفریدی نے کہا کہ کراچی کو پی ایس ایل میں رہنا چاہیے ، کراچی کنگز اچھی ٹیم کے خلاف جیتی ہے۔انہوں نے کہا کہ ابھی ٹورنامنٹ ہونے دیں پھر سب کی کارکردگی دیکھیں گے، ایک میچ پر کسی نوجوان کو نہ چڑھایا کریں ، توقعات کا پریشر آجانا ہے ، ابھی کھیلنے دیں۔
