لاہور( این این آئی)سابق وزیراعلیٰ پنجاب چودھری پرویزالٰہی سے عبدالستار اعوان ایڈووکیٹ، رضوان رحمت وڑائچ، احمد عثمان ایڈووکیٹ اور نادر دوگل ایڈووکیٹ نے ملاقات کی۔ ملاقات میں قانونی، سیاسی معاملات اور منی بجٹ بارے گفتگو کی گئی۔ چودھری پرویزالٰہی نے کہا کہ شہبازشریف اینڈ کمپنی کے منی بجٹ نے مہنگائی میں

پسے ہوئے عوام کو زندہ درگور کر دیا ہے، سیلز ٹیکس 18فیصد کرنے سے مہنگائی کا نیا طوفان آئے گا، عوام کی قوت خرید جواب دیتی جا رہی ہے، عوام ایک ہی بار الیکشن میں ن لیگ کے سب مظالم کا جواب دیں گے۔ انہوں نے کہا کہ عدلیہ آئین پر پہرہ دے رہی ہے لہٰذا گورنر اور چیف الیکشن کمشنر کی الیکشن سے فرار کی کوششیں کامیاب نہیں ہوں گی، ن لیگ کسی غلط فہمی میں نہ رہے الیکشن 90 روز میں ہی ہوں گے جس میں ن لیگ کا پنجاب سے صفایا ہو جائے گا۔ چودھری پرویزالٰہی نے کہا کہ مریم نواز ریکارڈ درست کر لیں سترہ 17 منزلہ آئی ٹی ٹاور شہباز شریف نے نہیں میں نے اپنے پہلے دور میں بنایا تھا، مریم نواز اس حوالہ سے نوجوانوں اور طلبا کو گمراہ نہ کریں اور شہبازشریف کی نالائقی چھپانے کیلئے جھوٹ کا سہارا نہ لیں۔ انہوں نے کہا کہ آئی ٹی ٹاور کو پورے ایشیا میں آئی ٹی ہب بننا تھا، لاکھوں نوجوانوں کو روزگار ملنا تھا، شہبازشریف نے صرف میری مخالفت میں اس منصوبہ کو برباد کر دیا، سب اس حقیقت سے واقف ہیں کہ پنجاب کے آئی ٹی سیکٹر میں سب کامیاب سکیمیں میری دی ہوئی ہیں، آئی ٹی سیکٹر میں شہبازشریف کی کارکردگی باقی شعبوں کی طرح بالکل صفر ہے، شہبازشریف نے اب تک عوام کو مہنگائی اور نوجوانوں کو بیروزگاری کا تحفہ دیا ہے اس کے علاوہ عوام کیلئے شہبازشریف نے کچھ نہیں کیا۔