لاہور( این این آئی)سابق وزیراعلیٰ پنجاب چودھری پرویزالٰہی اور سابق وفاقی وزیر مونس الٰہی نے سابق صدر و آرمی چیف جنرل پرویزمشرف کے انتقال پر گہرے دکھ و رنج و غم کا اظہار کیا ہے۔ چودھری پرویزالٰہی نے بیگم صہبا مشرف اور ان کے بیٹے بلال مشرف سے ٹیلیفون پر تعزیت کا اظہار کیا۔ انہوں نے کہا کہ

ہم اور ہمارا خاندان بیگم صہبا مشرف، بیٹے بلال مشرف اور بیٹی عائلہ مشرف کے غم میں برابر کے شریک ہیں، اللہ تعالیٰ پرویزمشرف کو جنت الفردوس میں جگہ عطا فرمائے۔ چودھری پرویزالٰہی نے کہا کہ پاکستان، آرمی اور ملک کیلئے پرویزمشرف کی خدمات کو فراموش نہیں کیا جا سکتا، پرویزمشرف ایک نہایت ہی محب وطن، قابل اور بہادر جرنیل تھے، چاہے کشمیر کا ایشو ہو یا پاکستان کا انہوں نے ہر جگہ آنکھوں میں آنکھیں ڈال کر بات کی، پرویزمشرف نے بھارت کے اندر جا کر بھارت کو للکارا جس کی مثال نہیں ملتی۔ انہوں نے کہا کہ پرویزمشرف کے دور کی معیشت نے جو ترقی کی اس کی مثال نہیں ملتی، اکانومی کو انہوں نے اپنے پائوں پر کھڑا کیا، تمام حکومتوں نے ان کو بھرپور سپورٹ کیا تبھی ہم اس قابل ہوئے کہ پنجاب میں جی ڈی پی گروتھ 8 فیصد پر تھی، پنجاب میں ہم نے 1122 جیسے ادارے بنائے جس کا اجر پرویزمشرف کو بھی ملتا رہے گا، گوادر کا جو منصوبہ ان کے دور میں شروع ہوا آج اس کا کریڈٹ سب لیتے ہیں، چائنہ کے ساتھ مل کر سی پیک ان کا منصوبہ تھا جس کو شریفوں نے آ کر تاخیر کا شکار کیا اور اس کو خراب کیا، آج دیکھ لیں گوادر اور سی پیک کا کتنا فائدہ ہے۔