اسلام آباد (نیوز ڈیسک) مسلح افواج کے دفاعی اداروں میں زیر تربیت کیڈٹس پارلیمنٹ اور آئین کو جاننے کے لئے پارلیمنٹ ہاﺅس کا دورہ کریں گے۔جنگ رپورٹر نوشین یوسف کے مطابق چیئرمین سینٹ میاں رضا ربانی نے پارلیمانی تعلیم پروگرام تشکیل دینے کا فیصلہ کیا ہے۔ ذرائع کے مطابق چیئرمین سینٹ رضا ربانی کی تجویز سے آرمی چیف جنرل راحیل شریف نے اتفاق کرتے ہوئے پروگرام کے آئیڈیا کو سراہا ہے۔ پارلیمانی تعلیم پروگرام میں مسلح افواج کے اکثر اداروں نے اظہار دلچسپی کرتے ہوئے ان لینڈ سٹڈی ٹور کے تحت کیڈٹس کو پارلیمنٹ ہاﺅس بھیجنے پر آمادگی ظاہر کی ہے۔ پارلیمنٹ تعلیم پروگرام کا باقاعدہ آغاز 26اکتوبر کو ہو رہا ہے اور پہلے مرحلے میں نیول وار کالج کے کیڈٹس پارلیمنٹ آئیں گے‘ جس کے بعد ملٹری اکیڈمی کاکول اور پاکستان ائرفورس اکیڈمی رسالپور کے کیڈٹس کا بھی پارلیمنٹ ہاﺅس دورے کا امکان ہے۔ کیڈٹس کو واپسی پر پارلیمنٹ سے متعلق کتابچہ اور آئین پاکستان کی کاپی بھی دی جائے گی۔