اسلام آباد(سپشیل رپورٹ)بھارت کے وزیر دفاع منوہر پارریکر نے کہا ہے کہ پاکستان اس بات کا فیصلہ کر لے کہ وہ بھارت کے ساتھ جنگ چاہتا ہے یا بھارت کی طرف سے مذاکرات کی پیشکش کو قبول کرے گا، جنگ مسائل کا حل نہیں ، پاکستان کے 2 وفاقی وزرا خواجہ آصف اور خواجہ سعد رفیق کی دھمکیاں مضحکہ خیز ہیں ، انہیں نواز شریف کا آشیر باد حاصل نہیں۔ 1965ئ کی پاک بھارت جنگ میں ہلاک ہونے والے فوجیوں کے عزیز و اقارب کے اعزاز میں ایک تقریب سے خطاب کرتے ہوئے انہوں نے کہا کہ بھارت کی طرف سے مسائل کے حل کے لئے پاکستان کو بار بارمذاکرات کی پیشکش کی گئی جو پاکستان نے ٹھکرادی جبکہ اس کے بعد جنگ کی مسلسل دھمکیاں دینا شروع کردیں۔ اب اگر پاکستان جنگ کا خواہش مند ہے تو بھارت اس کیلئے بھی تیار ہے لیکن وہ اب بھی پاکستان کو مشورہ دے رہے ہیں کہ جنگ مسائل کا حل نہیں ہے۔ پاکستان اوفا مفاہمت کے تحت بھارت سے مذاکرات کرے بھارت اسے خوش آمدید کہے گا پاکستان دہشت گردی کے خاتمہ کیلئے بھارت سمیت خطے کے دوسرے ممالک کا ساتھ دے۔ انہوں نے پاکستان کے 2 وفاقی وزرا خواجہ آصف اور خواجہ سعد رفیق کی طرف سے دی گئی دھمکیوں کو مضحکہ آمیز قرار دیا اور کہا کہ ایسا معلوم ہوتا ہے کہ پاکستان میں وزرا کو وزیراعظم نواز شریف کی آشیر باد حاصل نہیں ان کے بیانات نواز شریف کے بیانات سے بالکل الٹ ہیں۔ بھارتی وزیر دفاع نے مزید کہا کہ پاکستان کے وزیراعظم نواز شریف بھارت کے ساتھ اچھے تعلقات کے خواہاں ہیںاور اس کا ثبوت انہوں نے بھارتی وزیراعظم نریندر مودی کی تقریب حلف وفاداری میں شرکت کر کے دے دیا تھا لیکن نواز شریف کو ان کے وزرا بھارت کے ساتھ اچھے تعلقات کیلئے مذاکرات کی میز پر آنے سے روک رہے ہیںاور وہ امن کی بجائے جنگ کرنے کی دھمکیاں دے رہے ہیں۔