لاہور( این این آئی)پنجاب میں شدید دھند کی وجہ سے نظام زندگی معطل ہو گیا ،حد نگاہ انتہائی کی وجہ سے موٹرویز کو کئی مقامات سے بند رکھا گیا ، فضائی آپریشنز بھی متاثر رہا جس کی وجہ سے کئی پروازیں تاخیر کا شکار ہو گئیں، سرکاری و نجی ملازمین کو دفاتر جانے

اور طلبہ کو تعلیمی اداروںمیں پہنچنے میں شدید مشکلات درپیش رہیں ۔تفصیلات کے مطابق صوبائی دارالحکومت لاہور اور اس کے گرد و نواح میں شدید دھند کے باعث حد نگاہ صرف 50 میٹر رہ گئی ۔شدید دھند کے باعث موٹر وے کو کئی مقامات سے ٹریفک کے لیے بند رکھا گیا۔ترجمان موٹر وے کے مطابق دھند کی وجہ سے موٹر وے ایم ٹو کو لاہور سے کوٹ سرور تک، ملتان موٹر وے کو فیض پور انٹرچینج سے سمندری تک اور سیالکوٹ موٹر وے کو مکمل بند رکھا گیا ۔جی ٹی روڈ پر بھی حد نگاہ انتہائی کم رہی جس کے باعث روڈ یوزرز کو ہدایت کی گئی ہے کہ غیر ضروری سفر سے گریز کریں اور گاڑیوں پر فوگ لائٹس کا استعمال کر یں۔دھند چھٹنے کے بعد موٹر وے کو مرحلہ وار کھول دیاگیا۔محکمہ موسمیات کے مطابق دھند کا سلسلہ آئندہ چند روز جاری رہے گا۔دوسری جانب لاہور ایئرپورٹ پر دھند کے باعث مختلف ایئر لائنز کی پروازیں تاخیر کا شکار ہیں۔کراچی سے لاہور کیلئے روانہ ہونے والی پروازیں تاخیر کا شکار ہیں، اسی طرح لاہور سے کراچی کی پرواز بھی تاخیر کا شکار رہی ۔لاہور سے نجف اور دمام جانے والی پرواز بھی تاخیر کا شکار ہو گئیں جس کی وجہ سے مسافروںکو شدید مشکلات کا سامنا کرنا پڑا ۔