صوبائی اسمبلی تحلیل ہونے پر قومی نہیں متعلقہ صوبائی اسمبلی کا الیکشن دوبارہ ہوگا،  صوبائی حلقے میں انتخابات پر تقریبا پانچ سے سات کروڑ روپے خرچ ، ایک ہی سال میں ضمنی اورعام انتخابات کرانا مشکل ہے مگر قانون کے پابند ہیں، الیکشن کمیشن

اسلام آ باد (آئی این پی ) ترجمان الیکشن کمیشن نے کہا ہے کہ صوبائی اسمبلی تحلیل ہونے پر قومی نہیں بلکہ متعلقہ صوبائی اسمبلی کا الیکشن دوبارہ ہوگا ، صوبائی اسمبلی کے جتنے بھی اراکین مستعفی ہونگے انکی خالی سیٹوں پر 60 روز میں ضمنی انتخابات کرا دیں گے۔ چیئرمین پی ٹی آئی عمران خان کی جانب سے صوبائی اسمبلیوں کی تحلیل کے اعلان پر الیکشن کمیشن آف پاکستان کے ترجمان نے کہا کسی بھی صوبائی حلقے میں انتخابات پر تقریبا پانچ سے سات کروڑ روپے خرچ ہوں گے، ایک ہی سال میں ضمنی اورعام انتخابات کرانا مشکل ہے مگر قانون کے پابند ہیں۔ ترجمان نے مزید کہا کہ حلقہ بندیاں اور بلدیاتی انتخابات بھی مشکل کام تھا جو ہم نے کیا،پنجاب اورخیبرپختونخوا اسمبلی کے دوبارہ انتخاب پر کم ازکم ساڑھے 22ارب کا خرچ آئیگا۔