نئی دہلی (نیوزڈیسک)بھارتی آرمی چیف دلبیر سنگھ نے پاکستان کے خلاف مختصر جنگ کےلئے اپنی فوج کو تیار رہنے کا حکم دیتے ہوئے الزام عائد کیا ہے کہ پاکستان کی طرف سے سرحد پر جنگ بندی کی خلاف ورزیوں اور در اندازی کی کوششوں کے باعث ضروری ہے کہ فوج مختصر جنگ کےلئے تیار رہے ۔تینوں مسلح افواج کے 1965ءکی جنگ کے بارے میں سیمینار سے خطاب کرتے ہوئے بھارتی آرمی چیف نے کہاکہ مختصر وارننگ پر مستقبل میں مختصر جنگ ہوسکتی ہے اس کےلئے ہمیں ہر وقت تیار رہنا ہوگا اور یہ ہماری حکمت عملی کا اہم جز ہونا چاہیے ۔پاکستان کی طرف سے جنگ بندی کی بڑھتی ہوئی خلاف ورزیوں کے ماحول میں بھارتی فوج کےلئے تیار رہنا ضروری ہوگیا ہے ہمیں پیچیدہ قسم کے خطرات کا چیلنجز کا سامنا ہے انہوںنے دعویٰ کیا کہ بھارتی فوج حالیہ سالوں میں مضبوط ہوئی ہے اس نے سرحد پر بھی بھرپور جواب دیا ہے جموں و کشمیر میں بد امنی ختم کر نے کےلئے بھی نئے طریقے اختیار کئے جارہے ہیں حالیہ واقعات سے ثابت ہوتا ہے کہ تشدد بڑھ رہا ہے ۔انہوںنے دعویٰ کیا کہ 1965ءکی جنگ ہمارے حوصلے اور غیر معمولی عظمت کا ثبوت ہے مغربی محاذ پر پاکستان کومکمل نیچا دکھایا گیا تھا ۔انہوںنے کہاکہ اعتماد کی بحالی کے بعد ہی ہمیں چھ سال بعد 1971میں واضح کامیابی ملی