اسلام آباد (این این آئی)وزارت داخلہ نے صوبائی حکومتوں کو پی ٹی آئی کے لانگ مارچ کے حوالے سے خط لکھ کر لانگ مارچ سے عدم استحکام کا خدشہ ظاہر کر دیا۔ لکھے گئے خط کے متن کے مطابق کسی کو زبردستی طاقت کے ذریعے وفاق پر چڑھائی کی اجازت نہیں دی جا سکتی۔

وزارت داخلہ نے تمام صوبوں،آزاد کشمیر اور گلگت بلتستان حکومتوں کو خط لکھا جس میں کہاگیاکہ وفاق اور صوبائی حکومتوں کو آئین کے تحت اتحاد کا مظاہرہ کرنا چاہیے۔ خط میں کہاگیاکہ آئین کے آرٹیکل 148 (1) کے تحت ہر صوبہ وفاقی قوانین پر عملدرآمد کا پابند ہے۔ خط کے مطابق آئین کے آرٹیکل 149 (4)کے تحت وفاق صوبوں کو ہدایات دے سکتا ہے،تمام سرکاری ملازمین ریاستی قوانین کے تابع ہیں۔خط میں کہاگیاکہ تمام سرکاری ملازمین آئین کے تحت فرائض سرانجام دینے کے پابند ہیں،کسی حکومتی ملازم کو لانگ مارچ میں شرکت کی اجازت نہیں دی جائے گی۔خط میں کہاگیاکہ کسی قیمت پر ریاستی آئین اور قوانین سے انحراف کی اجازت نہیں ہو گی،صوبائی حکومتیں سرکاری ملازمین کو لانگ مارچ میں شرکت نہ کرنے کو یقینی بنائیں۔ خط میں کہاگیاکہ لانگ مارچ میں صوبائی حکومتیں آئیں اور قانون کے مطابق عمل درآمد کریں،پی ٹی آئی نے 28 اکتوبر کو لاہور سے لانگ مارچ شروع کرنے کا اعلان کر رکھا ہے۔