اسلام آباد( آن لائن ) چیئرمین پاکستان تحریک انصاف عمران خان نے کہا ہے کہ آڈیو لیکس کی تحقیقات کے لیے عدالت سے رجوع کا اعلان کرتے ہوئے کہا ہے کہ اس کے ذریعے پاکستان کی قومی سلامتی کی رازداری کو عالمی سطح پربے نقاب کیا گیا۔
اپنے ایک ٹویٹ میں آڈیو لیکس کے معاملے پر بات کرتے ہوئے چیئرمین پی ٹی آئی عمران خان کا کہنا تھا بحیثیت وزیراعظم میرے فون کی محفوظ لائن بگ کی گئی، آڈیو لیکس قومی سلامتی کی سنگین خلاف ورزی ہیں۔عمران خان نے آڈیو لیکس کو وزیراعظم آفس اور وزیراعظم ہاؤس کی سکیورٹی کے لیے سوالیہ نشان قرار دیتے ہوئے کہا کہ ہم لیکس کی صداقت جانچنے کے لیے عدالت جانے کا ارادہ رکھتے ہیں۔ انہوں نے مزید کہا کہ ہم جے آئی ٹی بنانے کا ارادہ بھی رکھتے ہیں تاکہ تحقیقات کی جاسکیں کون سی انٹیلی جنس ایجنسی ہے، یہ اس لیے اہم ہے کہ حساس سکیورٹی معاملات غیر قانونی طریقے سے ریکارڈ اور پھر ہیک وئے۔عمران خان کا کہنا ہے کہ آڈیو لیکس سے پاکستان کی قومی سلامتی کی رازداری کو عالمی سطح پربینقاب کیا گیا ہے۔
