ممبئی (این این آئی)200کروڑ روپے کی بھتہ خوری اور منی لانڈرنگ میں ملوث تہاڑ جیل میں قید ملزم سکیش چندر شیکھر سے اپنے تعلق سے متعلق اداکارہ جیکولین فرنینڈس نے نئے انکشافات کیے ہیں۔منی لانڈرنگ کیس کے مرکزی ملزم سکیش کی منی لانڈرنگ میں
مدد کرنے اور اس سے تحائف لینے کے الزام میں آج کل بھارتی اداکارائیں جیکولین فرنینڈس اور مشہور رقاصہ نورا فاتحی کو تفتیش کا سامنا ہے۔دہلی پولیس کے اقتصادی جرائم ونگ کی جانب سے دونوں اداکاراں سمیت بالی ووڈ کی مزید مشہور شخصیات سے بھی تفتیش کی جا رہی ہے۔سپیشل کمشنر آف پولیس رویندر یادو نے میڈیا سے گفتگو کے دوران جیکولین کی جانب سے دیے گئے بیان سے متعلق بتایا ہے۔رویندر یادو نے بتایا ہے کہ تفتیش کے دوران اداکارہ جیکولین نے اعتراف کیا ہے کہ اس کے ملزم سکیش کیساتھ تعلقات تھے، جیکولین سکیش سے متعلق کافی سنجیدہ تھیں اور اسے اپنے خوابوں کا شہزادہ سمجھتی تھیں، جیکولین کا سکیش چندر شیکھر سے شادی کا بھی ارادہ تھا۔دوسری جانب بھارتی میڈیا رپورٹس کے مطابق جیکولین فرنینڈس سکیش چندر شیکھر کے پیار میں اس قدر ڈوب چکی تھیں کہ اس کے جرائم بے نقاب ہونے کے باوجود بھی اداکارہ مسلسل سکیش سے رابطے میں تھیں۔
