اسلام آ باد (این این آئی)پاکستان میں سوکی کناری ہائیڈرو پاور اسٹیشن پر کام کرنے والی ایک چینی کمپنی نے واٹر ڈائیورڑن ٹنل کی تعمیر کامیابی کے ساتھ مکمل کر لی، جس سے پاور اسٹیشن کو چلانے اور بجلی پیدا کرنے کے حوالے سے مزید مضبوط بنیاد رکھی گئی ہے۔

اتوار کے روز سوکی کناری ہائیڈرو پاور اسٹیشن پراجیکٹ کمپنی کے ڈپٹی جنرل مینیجر چھن جیا جیا نے اس موقع پر منعقدہ تقریب سے خطاب کرتے ہوئے کہا کہ ڈائیورڑن ٹنل کی تکمیل اس بات کی نشاندہی کرتی ہے کہ ہائیڈرو پاور اسٹیشن پراجیکٹ ایک نئے تعمیراتی مرحلے میں داخل ہونے والا ہے اور یہ اپنے ہدف کے انتہائی قریب ہے۔ واٹر ڈائیورڑن ٹنل منصوبے کی تکمیل کے بعد، ہر سال 3.212 بلین کلو واٹ صاف بجلی فراہم کرنے کی توقع ہے۔حالیہ دنوں پاکستان کے کئی علاقوں میں شدید بارشوں اور سیلاب کا سامنا ہے۔ رپورٹس کے مطابق تعمیراتی پیش رفت کو یقینی بناتے ہوئے، ہائیڈرو پاور پراجیکٹ کمپنی نے مقامی حکومت کے ساتھ مل کر مذکورہ منصوبے کے علاقے میں پھنسے ہوئے لوگوں کے انخلائ ، تباہ شدہ سڑکوں اور پلوں کی مرمت ، پانی اور بجلی کی فراہمی کے نظام کو بحال کرنے کے لیے ایک ہنگامی باہمی تعاون کا طریقہ کار شروع کیا۔