دبئی (مانیٹرنگ ڈیسک) متحدہ عرب امارات میں جاری ایشیا کپ ٹی ٹوئنٹی ٹورنامنٹ کے فائنل میں پاکستان نے سری لنکا کے خلاف ٹاس جیت کر فیلڈنگ کا فیصلہ کیا۔پاکستان ٹیم میں 2 تبدیلیاں کی گئیں، حسن علی اور عثمان قادر کی جگہ نسیم شاہ اور شاداب خان کو ٹیم میں شامل کیا گیا۔ سری لنکا کی جانب سے کوشل مینڈس اور پاتھم نسانکا
نے اننگز کا آغاز کیا لیکن سری لنکا کی صرف دو رنز پر ہی پہلی وکٹ گر گئی جب کوشل مینڈس بغیر کوئی رنز بنائے پویلین لوٹ گئے، انہیں نسیم شاہ نے بولڈ کیا۔ سری لنکا کی دوسری وکٹ 23 کے مجموعی سکور پر گری دوسرے آؤٹ ہونے والے کھلاڑی پاتھم نسانکا تھے انہوں نے 8 رنز بنائے اور حارث رؤف کی گیند پر بابراعظم کے ہاتھوں کیچ آؤٹ ہوئے۔ سری لنکا کی تیسری وکٹ 36 کے مجموعی سکور پر گری، گھناتھیلا نے ایک رنز بنایا اور انہیں حارث رؤف نے بولڈ کیا، سری لنکا کا سکور 53 ہوا تھا کہ ان کی چوتھی وکٹ گر گئی، ڈی سلوا نے 28 رنز بنائے اور وہ افتخار احمد کی گیند پر انہی کے ہاتھوں کیچ آؤٹ ہوئے۔ سری لنکا کا سکور 58 ہوا تو ان کی پانچویں وکٹ بھی گر گئی، ڈاسن شانکا نے دو رنز بنائے اور وہ شاداب خان کا شکار بنے۔ سری لنکا کی چھٹی وکٹ ہسارنگا ڈی سلوا کی گری انہوں نے 36 رنز بنائے اور محمد رضوان نے حارث رؤف کی گیند پر ان کا کیچ تھام کر پویلین بھیج دیا۔ سری لنکا کی جانب سے راجاپکاسا نے شاندار کھیل کا مظاہرہ کیا انہوں نے پاکستانی باؤلرز کا ڈٹ کر مقابلہ کیا۔انہوں نے 45 گیندوں پر 71 رنز بنائے ان کی اننگ میں تین چھکے اور چھ چوکے شامل تھے، چامیکا نے 14 رنز بنائے اور دونوں کھلاڑی ناٹ آؤٹ رہے، اس طرح مقررہ 20 اوورز میں سری لنکا نے 170 رنز بنائے اور اس کے چھ کھلاڑی آؤٹ ہوئے، پاکستان کو سری لنکا نے 171 رنز کا ٹارگٹ دیا۔
پاکستان کی جانب سے حارث رؤف نے تین کھلاڑیوں کو آؤٹ کیا، شاداب خان، افتخار احمد اور نسیم شاہ نے ایک ایک کھلاڑی کو آؤٹ کیا۔ پاکستان کی جانب سے محمد رضوان اور بابر اعظم نے اننگز کا آغاز کیا، بابر اعظم نے 5 رنز بنائے کیچ آؤٹ ہو گئے، فخر زمان آج پر کوئی رنز بنائے بغیر آؤٹ ہو گئے، افتخار احمد نے 32 رنز بنائے اور کیچ آؤٹ ہوئے۔ محمد نواز بھی چھ رنز بنانے کے بعد کیچ تھما کرپویلین لوٹ گئے۔ محمد رضوان نے اچھی کوشش کی لیکن وہ بھی 55 رنز بنا کر کیچ دے بیٹھے۔
آصف علی کوئی رنز بنائے بغیر آؤٹ ہو گئے جبکہ خوشدل شاہ بھی دو رنز بنانے کے بعد کیچ تھما کر پویلین لوٹ گئے، شاداب خان نے آٹھ رنز بنائے اور وہ بھی کیچ دے بیٹھے۔ نسیم شاہ چار رنز بنانے کے بعد کیچ آؤٹ ہو گئے۔ حارث رؤف نے 13 رنز بنائے اور بولڈ ہو گئے، محمد حسنین 8 رنز کے ساتھ ناٹ آؤٹ رہے، پاکستان نے مقررہ اوورز 147 رنز بنائے اور آل ٹیم آؤٹ ہو گئی۔ غرض محمد رضوان اور افتخار احمد کے علاوہ کوئی بھی خاطر خواہ کھیل کا مظاہرہ نہ کر سکا اس طرح پاکستان کو فائنل میں سری لنکا کے ہاتھوں شکست کا سامنا کرنا پڑا۔
