اسلام آباد(این این آئی)ضلعی انتظامیہ نے پاکستان تحریک انصاف کی جانب سے ریلی نکال کر دفعہ 144 کی خلاف ورزی کرنے پر ذمہ داران کے خلاف مقدمات درج کرنیکا اعلان کیا ہے۔ضلعی انتظامیہ کے مطابق پی ٹی آئی کی ریلی دفعہ 144 کی خلاف ورزی

ہے، دفعہ 144 کی خلاف ورزی پر ذمہ داران کے خلاف مقدمات درج ہوں گے۔خیال رہے کہ پی ٹی آئی نے زیرو پوائنٹ سے ایف نائن پارک تک ریلی کے حوالے سے ضلعی انتظامیہ کو خط لکھا تھا، خط کے متن کے مطابق عمران خان نے ریلی کی قیادت کرنا تھی تاہم انتظامیہ نے پاکستان تحریک انصاف کو ریلی کی اجازت دینے سے منع کردیا۔ڈپٹی کمشنر اسلام آباد کے ترجمان کے مطابق تحریک انصاف نے ریلی کی اجازت اور سکیورٹی کے لیے درخواست دی تھی، ٹھوس وجوہات کی بنا پر ریلی نکالنے اور سکیورٹی دینے سے معذرت کی گئی۔ترجمان کے مطابق اسلام آباد میں سکیورٹی وجوہات پرکئی روز سے دفعہ 144 نافذ ہے، قیادت کے ساتھ ساتھ ریلی شرکاء کی قیمتی جانیں بھی خطرے سے دوچار ہو سکتی ہیں۔دوسری جانب انتظامیہ کی اجازت نہ ملنے کے باوجود پی ٹی آئی کارکنان شہباز گل سے اظہار یکجہتی کے لیے جمع ہوئے جبکہ عمران خان بھی جلسے سے خطاب کے لیے ایف نائن پارک پہنچے ۔