اسلام آباد (این این آئی)پاکستان تحریک انصاف کی جانب سے اپنے دور حکومت میں اپنے خلاف امریکی سازش کے دعوے سے چند روز قبل ہی پاکستان میں سی آئی اے کے سابق اسٹیشن چیف کی لابنگ فرم سے معاہدہ کیا گیا تھا۔خیال رہے کہ 27 مارچ 2022 کو
اس وقت کے وزیراعظم عمران خان نے اسلام آباد کے پریڈ گراؤنڈ کے جلسہ عام سے خطاب میں ایک کاغذ لہرایا تھا اور اپنی حکومت کے خلاف امریکی سازش کو جواز بنایا تھا۔عمران خان کا کہنا تھا کہ ملک میں باہر کے پیسیکی مدد سے حکومت تبدیل کرنے کی کوشش کی جارہی ہے، ہمیں لکھ کر دھمکی دی گئی، میرے پاس خط ہے اور وہ ثبوت ہے۔عمران خان کے اس دعوے سے کچھ روز قبل ہی ان کی حکومت نے پاکستان میں سی آئی اے کے سابق اسٹیشن چیف رابرٹ لورنٹ گرینیئر کی لابنگ فرم کے ساتھ امریکا میں اچھا امیج بنانے کے لیے معاہدہ کیا تھا۔عمران خان کی جانب سے امریکی سازش کے دعوے سے صرف 5 روز قبل 22 مارچ 2022 کو معاہدے پر دستخط کرنے والے کوئی اور نہیں بلکہ امریکا میں پاکستان کے وہی سابق سفیر اسد مجید تھے، جنہوں نے ڈانلڈ لو سے ہونے والی گفتگو کا احوال پاکستان بھیجا تھا۔یہ سب انکشافات سامنے آنے والی نئی دستاویزات میں ہوئے ہیں۔نجی ٹی وی کے مطابق اس سے قبل رابرٹ لورنٹ گرینیئر کے ساتھ ہی پہلا معاہدہ 2021 میں عمران خان کے مشیر افتخار درانی نے کیا تھا،جس کے تحت کمپنی کو 25 ہزار ڈالر ماہانہ دیگر اخراجات ادا کرنے کا فیصلہ کیا گیا تھا۔
