لندن(نیوز ڈیسک).یوں تواکثر بچوں کے والدین ان کے پھوہڑ پن اور سستی سے تنگ ہوتے ہیں اور بچوں کو ڈانٹ ڈپٹ کا نشانہ بناتے رہتے ہیں لیکن برطانیہ میں تو پھوہڑ پن پر انعام دیا جاتا ہے۔جی ہاں برطانیہ کی ایک فرنیچر کمپنی نے گندے ترین بیڈ روم کے منفرد مقابلے کا انعقاد کیا جس میں 40سے زائد افراد نے اپنا نام درج کرایا۔کمپنی کی جانب سے ایک ٹیم نے مقابلے کے تمام شرکا کے بیڈروم اچھی طرح چیک کرنے کے بعد 5سالہ ہیری کے بیڈ روم کو گنداترین قرار دے کر فاتح قرار دیا۔جبکہ 50سالہ سوئے کاٹن نامی خاتون بھی پھوہڑ پن میں کسی سے پیچھے نہ رہیں اور مقابلے میں دوسری پوزیشن حاصل کی۔مقابلہ جیتنے والے ہیری کو فرنیچر کمپنی کی جانب سے 5سو یورو مالیت کا ایک بیڈ دیا گیا ہے جبکہ دوسری اور تیسری پوزیشن پر آنے والے شرکاءکو بھی انعامات دیئے گئے ہیں۔