اسلام آباد(مانیٹرنگ ڈیسک) ملتان میں اگلے ماہ این اے 157 کی خالی ہونے والی نشست پر معرکہ آرائی ہوگی ،روزنامہ جنگ میں محمد صالح ظافر کی شائع خبر کے مطابق یہ نشست قومی اسمبلی کے رکن زین قریشی کے پنجاب اسمبلی کے رکن منتخب ہونے کی وجہ سے خالی ہوئی ہے۔

اس نشست کوآئین کے آرٹیکل 223 کے کلاز چار کے تحت خالی قرار دیا جائے گا۔ اس خالی نشست پر اگست کے مہینے میں دوبارہ الیکشن سے پر کیا جائے گا۔دوسری جانب پی ٹی آئی کے سابق رکن قومی اسمبلی ڈاکٹر عامر لیاقت کے انتقال کے باعث خالی ہونے والی نشست این اے 245 پر ضمنی انتخاب کا دنگل ستائیس جولائی کوسجے گا۔نجی ٹی وی دنیا نیوز کے مطابق کراچی سے قومی اسمبلی کا حلقہ این اے 245 سابق ایم این اے عامر لیاقت کے انتقال کے بعد ایک بار پھر سیاست کا محور ہے کیونکہ علاقہ مکین یہاں ستائیس جولائی کو اپنا نیا نمائندہ منتخب کریں گے۔ 2018 میں مرحوم ڈاکٹر عامر لیاقت حسین 56 ہزار سے زائد ووٹ لے کر پہلے، ایم کیو ایم پاکستان کے ڈاکٹر فاروق ستار 35 ہزار ووٹ لے کر دوسرے جبکہ تحریک لبیک پاکستان کے احمد رضا امجدی 20 ہزار ووٹ لے کر تیسرے نمبر پر رہے تھے۔اس مرتبہ بھی پی ٹی آئی کی جانب سے محمود مولوی، ایم کیو ایم پاکستان کے معید انور، ٹی ایل پی کے علامہ احمد رضا قادری اور پی ایس پی کے حفیظ الدین اور آزاد امیدوار کی حیثیت سے ڈاکٹر فاروق ستار سمیت مختلف سیاسی جماعتوں کے امیدوار مدمقابل ہیں جبکہ سیاسی جماعتوں کی جانب سے حلقے میں انتخابی سرگرمیوں کا آغاز بھی کر دیا گیا ہے ۔