لاہور،سرگودھا( این این آئی)پنجاب کے 14اضلاع کے 20حلقوں میںہونے والے ضمنی انتخابات کیلئے ضابطہ اخلاق جاری کر دیا۔انتخابی ضابطہ اخلاق پر 100 فیصد عملدرآمد اور لڑائی جھگڑے کے واقعات روکنے کیلئے امیدواروں اور ان کے حمایتیوں سے بلا تفریق ضمانتی مچلکے لئے جائیں گے۔

حکومت کی جانب سے جاری قواعد کے مطابق نجی گارڈز، ہوائی فائرنگ، اسلحہ کی نمائش، مخالفین کے کیمپس اور بینرز اکھاڑنے پر پابندی ہوگی جبکہ واقعات میں ملوث افراد کے خلاف بلاامتیاز قانون کارروائی کی جائے گی۔ضابطہ اخلاق کے مطابق ہنگامی صورتحال سے نمٹنے کیلئے ریزرو فورس اور اینٹی رائٹس فورس کے جوان الرٹ رکھے جائیں گے جبکہ انتخابات کی سینٹرل پولیس آفس اور ضلعی سطح پر کنٹرول روم میں مانیٹرنگ کی جائے گی۔دوسری جانب سرگودھا ریجن کے حلقہ پی پی 90بھکر ٹو میں 17جولائی کو ضمنی الیکشن کے پولنگ ڈے میں امن اومان کی صورتحال کو برقرار رکھنے کے لیے ماحول کو خراب کرنے والے شرپسند عناصر کے ضلع میں داخلہ پر پابندی عائد کر دی گئی۔ذرائع کے مطابق ڈی پی او بھکر سید علی رضا نے ضمنی الیکشن کے سیکورٹی انتظامات کے حوالہ سے بین الصوبائی چیک پوسٹ داجل کا سرپرائز وزٹ کیا اور ڈیوٹی پر مامور اہلکاروں کو ہدایات دیتے ہوئے کہا کہ ڈیوٹی الرٹ اور چوکس ہوکر کریں تاکہ کوئی شرپسند عناصر ضلع میں داخل نہ ہوسکے اور ضلع کا امن برقرار رہے۔ ڈی پی او بھکر کا کہنا تھا کہ بین الصوبائی چیک پوسٹ داجل اور دریائی راستوں پر چیکنگ کا عمل سخت کردیا گیا اور ماحول کو خراب کرنے والے شرپسند عناصر ضلع میں داخلہ پر پابندی عائد کردی گئی ہے ۔