لاہور( این این آئی)سپیکر پنجاب اسمبلی چودھری پرویزالٰہی سے پاکستان تحریک انصاف کے سینئر رہنمائوں سابق وفاقی وزیر فواد حسین چودھری اور سابق گورنر پنجاب عمر سرفراز چیمہ نے ملاقات کی۔ ملاقات میں ضمنی انتخابات کے حوالے سے تفصیلی تبادلہ خیال کیا گیا۔
سپیکر چودھری پرویزالٰہی نے کہا کہ کل تک ’’ووٹ کو عزت دو‘‘ کو نعرہ لگانے والی ن لیگ ڈھٹائی سے ’’لوٹوں کو ووٹ دو‘‘ کا نعرہ لگا رہی ہے، عوام کا غصہ کم کرنے کیلئے شہبازشریف اور حمزہ شہباز شعبدہ بازی کر رہے ہیں، مفت بجلی دینے کے جھوٹے اعلانات کیے جا رہے ہیں، باپ بیٹے کی سیاسی کشتی ڈوب رہی ہے، اب کسی بھی قسم کی شعبدہ بازی نہیں چلے گی، عوام پر ان جھوٹے اعلانات کا کوئی اثر نہیں ہو گا اور انشاء اللہ وہ ووٹ کے ذریعے 17 جولائی کو لوٹا سیاست کا خاتمہ کر دیں گے۔ انہوں نے کہا کہ پی ٹی آئی کی کامیاب مہم پر جعلی حکمران بوکھلا چکے ہیں، وزرا کے مستعفی ہونے سے بات نہیں بنے گی اب اس نااہل حکومت کو ہی جانا ہو گا، ضمنی انتخاب کے تمام حلقوں میں لوٹوں کی شکست نوشتہ دیوار ہے۔ چودھری پرویزالٰہی نے کہا کہ شہباز شریف جیسے بہروپیوں کی حقیقت عوام جان چکے ہیں، تاریخ میں پہلی بار ہوا ہے کہ انتخابات میں حکومت کو اپوزیشن کیخلاف امیدوار ہی نہیں ملا، چند مہینوں کی حکومت میں نااہل حکمران تاریخی مہنگائی کا تحفہ عوام کو دے چکے ہیں۔ سابق وفاقی وزیر فواد چودھری نے کہا کہ ضمنی انتخاب کے حلقوں میں گرفتاریاں حکومت کی بوکھلاہٹ ہے، تمام سروے پی ٹی آئی کی کامیابی کا اعلان کر رہے ہیں، ضمنی انتخابات میں دھاندلی حکمرانوں کو مہنگی پڑے گی، دھاندلی کے تمام حربوں کا ہمارے کارکن ڈٹ کر مقابلہ کریں گے،
معلوم نہیں کہ الیکشن کمیشن کب پنجاب حکومت کی مداخلت کا نوٹس لے گا۔ سابق گورنر عمر چیمہ نے کہا کہ تحریک انصاف کا راستہ روکنے کی ہر کوشش ناکام رہے گی، عمران خان کے کامیاب جلسے پی ٹی آئی کی کامیابی کا پیشگی اعلان کر رہے ہیں۔ ملاقات میں پی ٹی آئی رہنما سلیم بریار، ارکان پنجاب اسمبلی احسن سلیم بریار اور مسرت جمشید چیمہ بھی شریک تھیں۔
