لاہور( این این آئی)پسند کی شادی کرنے والی دعا زہرا کے شوہر ظہیر کو 14 جولائی تک حفاظتی ضمانت دیدی ہے،ظہیر نے گرفتاری کے خدشے پر عدالت سے رجوع کیا تھا۔لاہور ہائیکورٹ کی جسٹس عالیہ نیلم نے دعا زہرا کے شوہر ظہیر کی حفاظتی ضمانت سے متعلق درخواست پر سماعت کی ۔

ظہیر کی جانب سے موقف اپنا گیا تھا کہ دعا زہرا سے نکاح کیا ہے ،الزام لگایا جا رہا ہے کہ دعا کو اغوا ء کیا ، کراچی میں اغوا ء کا مقدمہ درج کردیا گیا ہے۔خدشہ ہے کہ پولیس گرفتار کر لے گی،استدعا ہے کہ عدالت حفاظتی ضمانت منظور کرے تاکہ متعلقہ عدالت سے عبوری ضمانت لی جا سکے۔لاہور ہائیکورٹ میں درخواست کی سماعت شروع ہوئی تو فاضل جج نے ظہیر کے وکیل سے استفسار کیا کہ کب کی ایف آئی آر درج ہے جس پر ظہیر کے وکیل رائے خرم نے معزز عدالت کو بتایا کہ 16 اپریل کو اغوا ء کی ایف آئی آر درج کی گئی تھی۔جسٹس عالیہ نیلم نے کہا کہ تو ابھی تک آپ کیا کر رہے ہیں۔ عدالت نے استفسار کیا کہ آپ کو کیسے پتا چلا کہ پولیس انہیں گرفتار کرنا چاہتی ہے۔وکیل نے عدالت کو جواب دیتے ہوئے بتایا کہ تفتیشی افسر کا بیان ہے کہ وہ معاملے کو ری انوسٹی گیٹ کر رہے ہیں،خدشہ ہے کہ پولیس گرفتار کر لے گی۔عدالت حفاظتی ضمانت منظور کرے تاکہ متعلقہ عدالت سے عبوری ضمانت لی جا سکے۔ اس موقع پر عدالت نے 14 جولائی تک ظہیر کی حفاظتی ضمانت منظور کرتے ہوئے درخواست نمٹا دی۔