اسلام آباد (این این آئی)محکمہ موسمیات نے ملک بھر میں مون سون کی بارشوں کا نیا الرٹ جاری کردیا۔محکمہ موسمیات نے رواں ہفتے ملک کے بیشتر حصوں میں مزید بارشوں کی پیش گوئی کی اور کہا ہے کہ مون سون ہوائوں کا سلسلہ شدت سے پاکستان میں داخل ہورہا ہے،

مون سون ہواؤں کاسلسلہ 24 سے 48 گھنٹے جاری رہ سکتا ہے، رواں ہفتے کے اختتام پر مون سون ہوائوں میں دوبارہ شدت آنے کاامکان ہے۔محکمہ موسمیات کے مطابق جمعرات تک اسلام آباد، کشمیر، سوات، مانسہرہ، کوہستان، ایبٹ آباد، ہری پور، پشاور، مردان، صوابی میں بارش کا امکان ہے۔اس کے علاوہ لاہور،گوجرانوالہ، سیالکوٹ، حافظ آباد ،فیصل آباد اور سرگودھا میں بھی موسلادھار بارش کا امکان ہے۔محکمہ موسمیات کے مطابق 7 جولائی تک ژوب، زیارت، بارکھان، کوئٹہ، لورالائی، کوہلو، قلات، خضدار، لسبیلہ، نصیر آباد، سبی، پنجگور، تربت، پسنی اور گوادرمیں بھی بارش کا امکان ہے۔محکمہ موسمیات کے مطابق رواں ہفتے کراچی، میر پور خاص، دادو، ٹھٹہ اور بدین میں موسلا دھار بارش کا امکان ہے۔محکمہ موسمیات نے خبردار کیا کہ بارشوں سے راولپنڈی، اسلام آباد اور فیصل آباد کے نشیبی علاقے زیر آب آنے کا خدشہ ہے جبکہ لاہور، گوجرانوالہ اور سیالکوٹ میں بھی نشیبی علاقے زیر آب آنے کا خطرہ ہے،موسلا دھار بارش سے راولپنڈی، کشمیر اور بلوچستان کے ندی نالوں میں طغیانی کا خدشہ ہے۔اس کے علاوہ کشمیر، گلیات ، مری، گلگت اور اسکردو میں بھی لینڈ سلائیڈنگ کا خدشہ ظاہر کیا گیا ہے۔ محکمہ موسمیات نے کہا ہے کہ صورتحال سے نمٹنے کیلئے متعلقہ ادارے الرٹ رہیں۔