اسلام آباد(نیوز ڈیسک)کراچی میں نامعلوم افراد کی فائرنگ کا نشانہ بننے والے رشید گوڈیل کو عارضی طور پر وینٹی لیٹر سے ہٹا دیا گیا ، ڈاکٹروں کا کہنا ہے کہ رشید گوڈیل کی حالت ابھی خطرے سے باہر نہیں ، انہیں آزمائشی بنیادوں پر وینٹی لیٹر سے ہٹایا گیا ہے۔تفصیلات کے مطابق ایم کیوا یم کے رکن قومی اسمبلی رشید گوڈیل قاتلانہ حملے کے بعد لیاقت نیشنل ہسپتال کے انتہائی نگہداشت وارڈ میں زیر علاج ہیں جہاں مختلف ماہر ڈاکٹروں کی ٹیم ان کے علاج میں مصروف ہے۔ڈاکٹروں کے پینل کے متفقہ فیصلے کے بعد انہیں عارضی طور پر وینٹی لیٹر سے ہٹا دیا گیا ہے۔ ترجمان لیاقت ہسپتال ڈاکٹر انجم رضوی کا کہنا ہے کہ وینٹی لیٹر سے ہٹانا علاج کا حصہ ہے ، فیصلہ آزمائشی طور پر کیا گیا۔سانس لینے میں دشواری کی صورت میں انہیں دوبارہ وینٹی لیٹر پر منتقل کر دیا جائے گا۔ دوسری طرف ہسپتال ذرائع کا کہنا ہے کہ رشید گوڈیل کی حالت میں پہلے سے بہتری آئی ہے اور ان کا پھیپھڑے کا انفکشن بھی کنٹرول میں ہے۔ان کے کمرے میں مستقل طور پر دو ڈاکٹروں کی ڈیوٹی لگائی گئی ہے ، رشید گوڈیل پر حملے کی تحقیقات کا سلسلہ بھی جاری ہے ،ان کی اہلیہ نے ڈی آئی جی ایسٹ منیر شیخ کی سربراہی میں قائم تحقیقاتی ٹیم کو بیان ریکارڈ کرا دیا ہے۔ان کا کہنا ہے کہ جب فائرنگ ہوئی تو وہ گاڑی میں نیچے بیٹھ گئیں جس کی وجہ سے وہ محفوظ رہیں ، اوپر اٹھ کر دیکھا تو رشید گوڈیل زخمی ہو چکے تھے۔تحقیقاتی ٹیم کو انہوں نے بتایا ہے کہ فائرنگ کس نے کی ، گاڑی کے کالے شیشے ہونے کی وجہ سے وہ انہیں پہچان نہیں سکتیں۔