آسٹریلوی کابینہ میں پہلی بار 2 مسلمان وزرا شامل

سڈنی (این این آئی)آسٹریلوی کابینہ میں پہلی بار 2 مسلمان وزرا شامل ہوگئے۔غیر ملکی میڈیا رپورٹس کے مطابق بدھ کے روز آسٹریلیا کی نئی حکومت نے حلف اٹھایا

جس میں ریکارڈ 13 خواتین اور پہلی بار 2 مسلمان وزرا وفاقی کابینہ کا حصہ بن گئے۔رپورٹس کے مطابق گورنر جنرل ڈیوڈ ہرلی کی زیر صدارت حلف برداری کی تقریب دارالحکومت کینبیرا میں منعقد ہوئی

جس میں منتخب ہونے والے وزیر اعظم انتھونی البانیس اور ان کی کابینہ کے رکن نے شرکت کی۔اطلاعات کے مطابق 30 رکنی نئی آسٹریلوی کابینہ میں پہلی بار 2 مسلمان وزرا ایڈ ہیوسک اور خاتون این ایلی شامل ہیں۔

رپورٹس کے مطابق ایڈ ہیوسک کو وزارت صنعت اور سائنس جبکہ این ایلی کو وزیر برائے یوتھ کی ذمہ داریاں سونپی گئیں ۔غیر ملکی میڈیا سے بات کرتے ہوئے ایڈ ہیوسک کا کہنا تھاکہ

کابینہ میں شامل ہونا یقینی طور پر ایک بہت بڑی ذمہ داری ہے جسے وہ پوری قوت کے ساتھ سرانجام دینے کی کوشش کریں گے۔انہوں نے کہا کہ ہم آسٹریلوی عوام کی معیار زندگی کو بہتر بنانے کے لیے اسی طرح مل کر کام کریں۔