بالی(این این آئی)انڈونیشیا میں پل پر سیلفی لینے کی کوشش میں ایک سیاح 160 فٹ سے زائد کی بلندی سے گر گیا۔غیر ملکی میڈیا رپورٹس کے مطابق ہفتے کے روز انڈونیشیا کے جزیرے بالی میں چھٹیاں منانے کیلئے آنے والا 35 سالہ کینیڈین سیاح سیلفی لینے کی کوشش کے دوران پل سے گر کر شدید زخمی ہوگیا۔رپورٹس کے مطابق متاثرہ شخص کو متعدد چوٹیں آئیں اور وہ ہسپتال کے انتہائی نگہداشت وارڈ میں زیر علاج ہے ، عینی شاہدین کا کہنا ہے کہ سیاح پاؤں پھسلنے کی وجہ سے پل سے گرا۔غیر ملکی میڈیا کے مطابق ریسکیو اہلکاروں کا کہنا ہے کہ واقعے کی اطلاع ملتے ہی ہم نے فوری طور پر اپنی ٹیم کو وہاں روانہ کیا اور متاثرہ شخص کی تلاش شروع کردی تاہم دو گھنٹے بعد زخمی شخص کو ریسکیو کرکے ہسپتال منتقل کیا گیا۔